ԵՄ-ը 150 միլիարդ եվրոյի հիմնադրամ է ստեղծում Ուկրաինայի վերազինման և աջակցության համար։ Այս մասին հաղորդում է Financial Times-ը։ 

Ըստ պարբերականի՝ ԵՄ անդամ պետությունները համաձայնության են եկել ստեղծել 150 միլիարդ եվրոյի զենքի վարկավորման հիմնադրամ։ Այս նախաձեռնությունը Եվրահանձնաժողովի կողմից առաջարկվել էր այս տարվա սկզբին՝ որպես մայրցամաքի վերազինումը արագացնելու միջոց։

Մեխանիզմը անդամ պետություններին թույլ կտա Բրյուսելից վարկ վերցնել և դրանք օգտագործել զենք գնելու համար, հիմնականում՝ համատեղ գնումների միջոցով։ Հաղորդվում է, որ այսօր առավոտյան դաշինքի երկրները նախնական համաձայնության են եկել հիմնադրամի պարամետրերի վերաբերյալ։ Պաշտոնական հաստատումը սպասվում է չորեքշաբթի օրը։

Մենք հասկանում ենք, որ Ուկրաինայում խաղաղության կարգավորման շուրջ բանակցությունները փակուղի են մտել․ հայտարարել է ԱՄՆ փոխնախագահ Ջեյ Դի Վենսը։

«Ուկրաինական հակամարտության լուծման ճանապարհին այնքան շատ խոչընդոտներ կան, որ դժվար է որևէ կոնկրետ բան առանձնացնել»,- ասել է ԱՄՆ փոխնախագահը։

Նրա խոսքով՝ Պուտինը, կարծես, այնքան էլ չի հասկանում, թե ինչպես դուրս գալ պատերազմից։

Վենսը նշել է, որ եթե Ռուսաստանը չի ցանկանում մասնակցել այդ գործընթացին, ԱՄՆ-ն ստիպված կլինի ասել, որ «դա իր պատերազմը չէ»:

ԱՄՆ նախագահ Դոնալդ Թրամփը բաց է Ռուսաստանի նախագահ Վլադիմիր Պուտինի հետ հնարավոր հանդիպման համար։ Այս մասին հայտարարել է Սպիտակ տան մամուլի քարտուղար Քերոլայն Լևիթը՝ պատասխանելով լրագրողների հարցերին։

«Նախագահը միանշանակ բաց է հանդիպման համար», - ասել է նա լրագրողներին:

Սպիտակ տան մամուլի քարտուղար Քերոլայն Լևիթն այսօր կայացած ճեպազրույցում ասել է, որ հանդիպումը, ի թիվս այլ բաների, կախված կլինի այսօրվա հեռախոսազրույցի արդյունքներից։

Մինչդեռ ՌԴ նախագահի մամուլի քարտուղար Դմիտրի Պեսկովն ասել է, որ Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի հանդիպումը դեռևս չի պատրաստվում: Նա հիշեցրել է, որ ժամը 17:00-ին նախատեսված է նախագահների հեռախոսազրույցը: 

Այսօր՝ մայիսի 19-ին, տեղի կունենա Վլադիմիր Պուտինի և Դոնալդ Թրամփի հեռախոսազրույցը։ Այն նախատեսված է Երևանի ժամանակով 18:00-ին։

ԱՄՆ դոլարի փոխարժեքն այսօր՝ մայիսի 19-ին, կազմել է 386.2  դրամ՝ նախորդ օրվա համեմատ նվազել է 0.13 դրամով: Այդ մասին տեղեկանում ենք Կենտրոնական բանկի պաշտոնական կայքից։

Եվրոյի փոխարժեքը կազմել է 435.48 դրամ (աճել  է 2.79 դրամով), բրիտանական ֆունտի փոխարժեքը կազմել է  516.97 դրամ (աճել է 3.46 դրամով), իսկ ռուսական ռուբլու փոխարժեքը կազմել է 4.80 դրամ (աճել է 0.03 դրամով):

Հայաստանյան բանկերում դոլարը գնվում է 381-384 դրամով, վաճառվում է 387-388.5 դրամով: Եվրոն բանկերում գնվում է 422-431 դրամով, վաճառվում է 436.5-440 դրամով:

Ռուբլին բանկերում գնվում է 4.65-4.72 դրամով, վաճառվում է 4.85-5.00 դրամով:

Փոխանակման կետերում իրավիճակը հետևյալն է.դոլարը գնվում է 384 դրամով, վաճառվում՝ 387 դրամով:

Եվրոն գնվում է 430 դրամով, վաճառվում է 435–436 դրամով:

Ռուբլին գնվում է 4.65 դրամով, վաճառվում է 4.75 դրամով:

Մայիսի 19-ին՝ ժամը 16:02-ին, Ճգնաժամային կառավարման ազգային կենտրոն ահազանգ է ստացվել, որ Երևան քաղաքի Սիլվա Կապուտիկյան փողոցում ավտոմեքենաներ են բախվել․ տեղեկացնում են ՆԳՆ ՓԾ-ից։
Դեպքի վայր են մեկնել հրշեջ-փրկարարներ՝ 4 մարտական հաշվարկ։

Տեղում պարզվել է, որ այրվում է 4 տրանսպորտային միջոցներ, որոնցից 3-ը՝ մարդատար, իսկ 1-ը՝ բետոնախառնիչ։ Տուժածների վերաբերյալ տեղեկությունները ճշտվում են։ Կտրվի լրացուցիչ տեղեկատվություն։

Մոտ մեկ ժամ առաջ էր, մենք տանը նստած էինք, ուժեղ գմփոց եղավ, դուրս եկանք, բան չէր երեւում, ծուխ էր ելնում, կրակ ու գմփգմփոցի ձայներ։ Այս մասին NEWS.am–ի հետ զրույցում պատմեց Երեւանի Սիլվա Կապուտիկյան 2 շենքի բնակիչներից մեկը, ով ականատես է եղել պայթյուններին ու հրդեհին։

«Այդ պայթունները, ինձ թվում է՝ կաբելներն էին, որովհետեւ այդ անկյունից կաբելները բարձրանում են ենթակայան։ Այնտեղ երեք հատ ավտո է վառվել, մեկն էլ  ներքևում այդ տաքությունից, վալնայից է վառվել։ Մենք եկանք վռազ, սա սա է վինտիլը։ Այստեղ բարձր ճնշման գազի խողովակն է, մեքենան խփել էր, խողովակը ընկել էր գետին, գազն էլ դուրս էր գալիս ու կպել է։

Զանգ տվեցինք, եկան հրշեջները, հանգցրեցին կրակը։ Այստեղ ինչքան մեքենա կար, մարդիկ վախեցան բոլորը հանեցին դուրս այդ տարածքից։ Այնտեղ անկյունում կայանված մեքենաներից մեկը վառվել է, հետևի կողմը ապակիները լրիվ հալվել են»,–ասաց նա։

Ականատեսը պատմեց, որ այդ հատվածում շատ ուժեղ թեք է եւ ծանր մեքենաները չեն կարողանում բարձրանալ. «Մի անգամ դեպք էր եղել, որ մեքենան կանգնել էր, հետո հետ էր եկել, շոֆերին խփել էր, գցել էր հայաթի մեջ, լավ ա սաղ մնաց»։

Ավելի վաղ հայտնել էինք, որ այսօր՝ մայիսի 19-ին՝ ժամը 16:02-ին, Ճգնաժամային կառավարման ազգային կենտրոն ահազանգ է ստացվել, որ Երևան քաղաքի Սիլվա Կապուտիկյան փողոցում ավտոմեքենաներ են բախվել։

Դեպքի վայր են մեկնել հրշեջ-փրկարարներ՝ 4 մարտական հաշվարկ։ Տեղում պարզվել է, որ այրվում է 4 տրանսպորտային միջոցներ, որոնցից 3-ը՝ մարդատար, իսկ 1-ը՝ բետոնախառնիչ։ Նախնական տվյալներով տուժածներ չկան։

Ռուսաստանը մեծացնում է ռազմական ներկայությունը Ֆինլանդիայի հետ սահմանին, գրում է New York Times-ը՝ հիմնվելով արբանյակային լուսանկարների վերլուծության վրա։

ուսանկարներում, որոնք հաստատել են ՆԱՏՕ-ի ներկայացուցիչները, երևում են վրանների շարքեր, ռազմական տեխնիկայի նոր պահեստներ, կործանիչների համար նախատեսված թաքստոցների վերանորոգում և ուղղաթիռային բազայում շինարարություն, որը գրեթե չէր օգտագործվել և մոլախոտով էր պատվել։

Ֆինլանդիայի հետ սահմանին ներկայության ուժեղացումը, ամենայն հավանականությամբ, երկարաժամկետ ծրագրի մաս է։ Սա բոլորովին նման չէ նրան, ինչ տեղի էր ունենում Ուկրաինայի հետ սահմանին 2022 թվականին, գրում է NYT-ն։

Ֆինն պաշտոնյաների կարծիքով, Ռուսաստանին մոտ հինգ տարի կպահանջվի, որպեսզի սահմանին ռազմական ներկայությունը հասնի «սպառնալից» մակարդակի։

Վերլուծաբանները, գրում է NYT-ն, կարծում են, որ Ուկրաինայում պատերազմի սուր փուլի ավարտից հետո Ռուսաստանը կկենտրոնացնի իր զորքերը ՆԱՏՕ-ին սահմանակից շրջաններում և հատկապես Արկտիկայում։

Նիկոլ Փաշինյանն ընդունել է Հայաստանի Հանրապետությունում Չինաստանի Ժողովրդական Հանրապետության նորանշանակ արտակարգ և լիազոր դեսպան Լի Սինվեյին:

ՀՀ վարչապետի աշխատակազմից հայտնում են, որ Նիկոլ Փաշինյանը շնորհավորել է Լի Սինվեյին դեսպանի պաշտոնը ստանձնելու առիթով և մաղթել հաջողություններ՝ ի նպաստ Հայաստանի և Չինաստանի միջև հարաբերությունների հետագա զարգացման ու ընդլայնման: Նիկոլ Փաշինյանը հույս է հայտնել, որ Լի Սինվեյի պաշտոնավարման ընթացքում երկկողմ հարաբերություններում կգրանցվեն կոնկրետ արդյունքներ:   

Դեսպանը շնորհակալություն է հայտնել ջերմ հյուրընկալության համար և ընդգծել, որ կներդնի բոլոր ջանքերը՝ երկկողմ փոխգործակցությանը նոր ազդակ հաղորդելու և առևտրատնտեսական, մշակութային կապերը զարգացնելու համար: 

Զրուցակիցները կարևորել են տնտեսության, զբոսաշրջության ոլորտներում համատեղ ծրագրերի իրականացումը, այդ թվում՝ ուղիղ ավիաչվերթերի թվի ավելացումը: Անդրադարձ է կատարվել բարձր մակարդակի փոխայցելությունների կազմակերպմանը, միջազգային կազմակերպությունների շրջանակում համագործակցությանը: Մտքեր են փոխանակվել ՀՀ կառավարության «Խաղաղության խաչմերուկ» նախագծի և դրա սկզբունքների շուրջ:    

Րոպեներ առաջ երկու բարձր պայթյուն է լսվել Երևանի կենտրոնում գտնվող փողոցներից մեկում, ահազանգում են սոցցանցերում:

Հրապարակվող կադրերից երևում է, որ հրդհեը բռնկվել է ՀՀ նախագահի նստավայրից ոչ հեռու գտնվող շենքերից մեկում։  Հրշեջների մարտական հաշվարկ է ուղևորվել դեպքի վայր։

Ավելի ուշ ականատեսներից մեկը տեսանյութ է հրապարակել, որում երևում է, որ Անտառային փողոցում այրվողը բետոնախառնիչ մեքենա է, տեսանյութում լսվում են պայթյունի ձայներ:

«Ու մենք ապրում ենք անտերության երկրում, որտեղ նախագահական նստավայրի հարևանությամբ շինարարություն է ընթանում և չթույլատրված  քանդում էին ճանապարհը, որպեսզի իրենց տեխնիկան բարձրացնեն: Սա է քաղաքապետարանի և անտեր կառավարության աշխատանքի արդյունքը»,- նշել է քաղաքացին:

Մայիսի 20-21-ը Ռուսաստանի Դաշնության արտաքին գործերի նախարար Սերգեյ Լավրովը աշխատանքային այցով կայցելի Երևան:  Այս մասին հայտնում են ՌԴ ԱԳՆ-ից:Նշված է, որ նախատեսված են հանդիպումներ Հայաստանի Հանրապետության արտաքին գործերի նախարար Արարատ Միրզոյանի, վարչապետ Նիկոլ Փաշինյանի և նախագահ Վահագն Խաչատուրյանի հետ:

«Արտաքին քաղաքական գերատեսչությունների ղեկավարները առարկայական մտքեր կփոխանակեն տարածաշրջանային անվտանգության խնդիրների, այդ թվում՝ հայ-ադրբեջանական և հայ-թուրքական կարգավորման գործընթացների հեռանկարների շուրջ»,- ասվում է ՌԴ ԱԳՆ տարածած հաղորդագրության մեջ։ 

Նշվում է, որ Մոսկվայում ակնկալում են, որ այցը կնպաստի Ռուսաստանի և Հայաստանի միջև քաղաքական և միջգերատեսչական երկխոսության ամրապնդմանը, կհանգեցնի փոխըմբռնման աճի և կողմերից յուրաքանչյուրի համար հետաքրքրություն ներկայացնող հարցերի շուրջ փոխընդունելի հանգուցալուծումների գտնմանը: