Իրանի միջուկային պաշարների վերաբերյալ բանակցությունների, ստուգման և պարզաբանման բացակայության պայմաններում, տարածաշրջանում շատերը վախենում են, որ Իսրայելի հետ նոր պատերազմն անխուսափելի է.  գրում է The New York Times պարբերականը։ 

Նախագահ Թրամփը պնդում է, որ այս ամռանը ԱՄՆ հարվածները «ոչնչացրել են» Իրանի ուրանի հարստացման ծրագիրը, սակայն տարածաշրջանային պաշտոնյաներն ու վերլուծաբանները վերջին ամիսներին ավելի նվազ վստահ են և զգուշացնում են, որ Իսրայելի և Իրանի միջև նոր պատերազմի բռնկումը միայն ժամանակի հարց է։

Իրանի ուրանի հարստացման սահմանափակմանն ուղղված 2015 թվականի համաձայնագրի ժամկետը լրացել է անցյալ ամիս։ Իրանի դեմ խիստ պատժամիջոցները վերականգնվել են։ Նրա միջուկային ծրագրի շուրջ բանակցությունները, կարծես, կանգ են առել, համենայն դեպս, ներկա պահին։ Ըստ իսրայելցի պաշտոնյաների՝ Իրանի բարձր հարստացված ուրանի պաշարները, որոնք բավարար են 11 միավոր միջուկային զենք արտադրելու համար, կամ թաղված են փլատակների տակ, կամ տեղափոխվել են անվտանգ վայր։

Այս ամենի հետևանքով վտանգավոր փակուղի է ստեղծվել. Բանակցությունները կանգ են առել, Իրանի զինանոցի վերաբերյալ որևէ վստահություն չկա, չկա նև անկախ վերահսկողություն։ Պարսից ծոցի երկրներից շատերը կարծում են, որ դա Իրանի վրա Իսրայելի հերթական հարձակումը գործնականում անխուսափելի է դարձնում՝ հաշվի առնելով իսրայելցի պաշտոնյաների վաղուց ի վեր տարածված այն տեսակետը, ըստ որի Իրանի միջուկային ծրագիրը էքզիստենցիալ սպառնալիք է։

Իրանը, ամենայն հավանականությամբ, Իսրայելի ցանկացած հարձակմանը կպատասխանի շատ ավելի քիչ զսպվածությամբ, քան հունիսին, հայտարարել է Միջազգային ճգնաժամային խմբի «Իրան» նախագծի տնօրեն Ալի Վաեզը։ Իրանցի պաշտոնյաները նրան հայտնել են, որ հրթիռային գործարաններն աշխատում են շուրջօրյա ռեժիմով, և որ մեկ այլ պատերազմի դեպքում «նրանք հույս ունեն միաժամանակ արձակել 2000 հրթիռ՝ Իսրայելի պաշտպանությունը խափանելու համար, այլ ոչ թե 500-ը 12 օրվա ընթացքում», ինչպես արել էին հունիսին։