Կալիֆոռնիայի Սիմի Վելի քաղաքում Van’s RV-10 փոքր ինքնաթիռը կործանվել է՝ ընկելով բնակելի տան տանիքին: Օդաչուն, որի ինքնությունը չի հաղորդվում, միակ մարդն է եղել ինքնաթիռում: Նա զոհվել է։

Ինքնաթիռի ընկնելուց հետո հրդեհ է բռնկվել, հայտնում է ABC News-ը։ Ընկնելու պահին տանը բնակիչներ են եղել։ Նրանք չեն տուժել, ասել է Վենտուրա շրջանի հրշեջ ծառայության ներկայացուցիչ Էնդրյու Դաուդը։

Դեպքի վայր է մեկնել 40 հրշեջ, որոնք մարել են կրակը։ Ինքնաթիռը օդ է բարձրացել Լանկաստերի Ուիլյամ Ջեյ Ֆոքսի օդանավակայանից և ուղղություն է վերցրել դեպի Կամարիլո օդանավակայան, հայտնում է ԱՄՆ Դաշնային ավիացիոն վարչությունը:

Ուկրաինայի հետ հաշտեցումն անխուսափելի է. այս մասին, ՏԱՍՍ-ի փոխանցմամբ, լրագրող Պավել Զարուբինին ասել է ՌԴ նախագահ Վլադիմիր Պուտինը:

«Ռուս ժողովրդի ուկրաինական հատվածի հետ հաշտությունն անխուսափելի է, դա ժամանակի հարց է», - ընդգծել է նա:

Պուտինը նաև հավելել է, որ «Ռուսաստանն ունի բոլոր անհրաժեշտ ուժերը՝ առանց միջուկային զենքի կիրառման Ուկրաինայում հատուկ գործողությունը հաջողությամբ ավարտելու համար»:

«Մեզ ուզում էին սադրել, ուզում էին, որ սխալվենք: Եվ միջուկային զենքերն օգտագործելու կարիք չկար, հուսով եմ, որ դրա կարիքը չի լինի: Մենք ունենք բավականաչափ ուժ և ռեսուրսներ՝ 2022 թվականին սկսածն իր տրամաբանական ավարտին հասցնելու այն արդյունքով, որն անհրաժեշտ է Ռուսաստանին»,- եզրափակել է ՌԴ նախագահը։

Երևանի «Արարատ» թենիսի մարզական ակումբում կայացել է ամենամյա «Արարատ Յունիորս» մրցաշարը, որն անց է կացվում 8, 10, 12, 14 և 16 տարեկան մարզիկների միջև:

Մայիսի 3-ին Հայաստանի թենիսի ֆեդերացիայի հովանու ներքո տեղի ունեցավ մրցաշարի մեդալների հանձնման հանդիսավոր արարողությունը:

Այս տարին տարբերվում էր մարդաշատությամբ և մարզիկների քանակով. միայն 10-16 տարեկան մարզիկների մրցաշարերին մասնակցեցին ավելի քան 105 տղաներ և աղջիկներ՝ պայքարելով Հայաստանի Թենիսի ֆեդերացիայի վարկանիշային միավորների համար:

Երևանի «Արարատ» թենիսի մարզական ակումբից հայտնեցին, որ մայիսի 12-ից ակումբի կորտերում մեկնարկելու է Թենիսի Եվրոպայի մինչև 12 տարեկանների պրոֆեսիոնալ միջազգային մրցաշարը, որին արդեն իսկ մասնակցելու հայտ են ներյացրել 23 տղաներ և 23 աղջիկներ՝ Վրաստանից, Ռուսաստանի Դաշնությունից, Բելառուսից, Հունաստանից, Ղազախստանից, Իսրայելից, Թունիսից, Սերբիայից, ԱՄՆ-ից և իհարկե Հայաստանից:

Մրցաշարն ավանդական է. ամեն տարի անց է կացվել Երևանի «Ինկորտ» և Ծաղկաձորի գլխավոր մարզահամալիրի կորտերում:

Մրցաշարը անվանակոչված է հայկական թենիսի դպրոցի կայացման մեջ նշանակալի ավանդ ունեցած երջանկահիշատակ Ռոզա Պրուդնիկովայի անվամբ:

Այսօր Հայոց Եկեղեցում Աշխարհամատրան կամ Կանաչ կիրակին է:

Մայր Աթոռի Քրիստոնեական դաստիարակության կենտրոնի տնօրեն Հոգեշնորհ Տ. Զաքարիա ծայրագույն վարդապետ Բաղումյանը նշում է՝ այս տոնը մեզ մտովի տանում է առաքելական շրջան, երբ Երուսաղեմի Վերնատան մեջ առաքյալների կողմից հիմնվեց աշխարհի առաջին մատուռը` եկեղեցին:

«Նույն այս Վերնատանը Հիսուս հաստատեց նաև Ս. Հաղորդության կենդանարար խորհուրդը, առանց որի իմաստազուրկ է քրիստոնյայի կյանքը:

Այստեղ նաև Հոգեգալստին Ս. Հոգին կրակե լեզուների տեսքով իջավ առաքյալների վրա, որից հետո նրանք առանց երկմտելու արիաբար գնացին և տարածեցին Ավետարանն ամբողջ աշխարհում:

Օրվա խորհուրդն ասես մեզ կապում է Տիրոջ առաքյալների և առաջին քրիստոնյաների հետ, որոնք «հարատևում էին առաքյալների ուսուցման, հաղորդության, հացի բեկման և աղոթքների մեջ» (Գործք Բ 42):

Իսկ տոնին տրված «Կանաչ» մակդիրը Քրիստոսի հարությամբ բնության և մարդկային կյանքի վերազարթոնքի խորհուրդն ունի: Թող հարության հույսն ու հավատքը մշտապես զորացնեն և ուղեկցեն մեզ այս կյանքում՝ դյուրությամբ հաղթահարելու բոլոր խնդիրներն ու խոչընդոտները»,- նշել է Հայր Զաքարիան։

Հանրահայտ հոգեբան Միխայիլ Լաբկովսկու կենսական իմաստնությունը 

• Սերը պետք չէ վաստակել, ավելին, այն չի կարելի վաստակել։ 

• Կյանքի համար ընդհանուր առմամբ նշանակություն չունի, թե դուք ինչ եք մտածում։ Նշանակություն ունի միայն այն, ինչ դուք զգում եք, ու այն, ինչ անում եք։ 

• Լավ մարդու ցանկությունները համընկնում են իրեն շրջապատողների շահերի հետ։

• Գլուխ հանել պետք է ոչ թե քեզ շրջապատողներից, այլ հենց ինքդ քեզնից։

• Գոյության իմաստի մասին հարցերը մեծ խելքից ու հասունությունից չեն ի հայտ գալիս, այլ հենց այն պատճառով, որ մարդը ոչ մի կերպ չի ապրում։ Կյանքի իմաստը հենց կյանքի մեջ է։

• Ինչո՞վ են հոգեպես առողջ մարդիկ տարբերվում նևրոտիկներից. նրանով, որ հոգեպես առողջ մարդիկ, իհարկե, նույնպես նյարդայնանում են, բայց իրական էմոցիաներ են ապրում, նրանք, ովքեր իրական ծանրակշիռ պատճառներ ունեն, դրանք կոնկրետ իրադարձություններ են, արտաքին աշխարհի գրգռիչներ։ Ի հակադրություն նրանց՝ նևրոտիկներն իրենց նյարդային վիճակի պատճառներն անընդմեջ իրենց մեջ են գեներացնում։

• Զուգընկերոջ ընտրության հարցում սխալվել չի կարելի, քանի որ կյանքը տալիս է ոչ թե այն, ինչ դուք ուզում եք գլխով, այլ այն, ինչ ձեզ տվյալ պահին պետք է։ Դո՞ւր է գալիս դա ձեզ, թե՞ ոչ, այլ խոսակցություն է։

• Տագնապային մարդկանց համար կյանքը սոսկ խնդիրների հաջորդականություն է, որոնք պետք է լուծել, և հուզումների շարք, որը պետք է կամ խլացնել, ճնշել, ենթադրենք, ալկոհոլով, կամ էլ իրականացնել՝ ասենք, հիստերիայի մեջ ընկնելով։ Հենց այսպես էլ անցնում է նրանց օրը։

• Եթե մարդկանց մոտ սեքսում ամեն բան լավ է, նշանակում է, ինչ-որ գլխավոր, խորքային, հիմնարար բաներում նրանք բացարձակապես միակամ են։ Եվ դա ամենակարևոր մակարդակն է, որը պետք է զույգերի մոտ համընկնի։

• Մի լսեք խորհրդատուներին։ Լսեք ինքներդ ձեզ։ Ինչ որ ընտրել եք մենյուից, այն էլ կերեք։ Հետևեք ձեր որոշումներին ու հարգեք դրանք, այլապես այդպես էլ ողջ կյանքում դուրս չեք գա «հավանաբար»-ի ու «չգիտեմ»-ի ներքին կոնֆլիկտի հորձանուտից։

• Եթե դուք այսօր չեք ուզում աշխատանքի գնալ, հանգստյան օր վերցրեք։ Եթե վաղն էլ չեք ուզում գնալ, ևս մեկ օր վերցրեք, իսկ եթե վաղը չէ մյուս օրն էլ աշխատանքի գնալու ցանկություն չկա, փոխեք աշխատանքը։ Եվ հարցն այստեղ ծուլության մեջ չէ։ Ծուլությունը կամ կամքի խնդիր է, կամ մոտիվացման։

• Դու ուզում եք լինել գեղեցի՞կ, թե՞ երջանիկ։ Եթե երկրորդը, աշխատել պետք է ոչ թե արտաքինի, այլ ինքնագնահատականի վրա։ Սիրեք ձեզ ցանկացած արտաքինով, և այդ ժամանակ արտաքինն իսկապես ցանկացածը կարող է լինել։ Դա օրենք է։

• Մի վախեցեք միայնության մեջ մնալուց։ Մի վախեցեք, որ այդպիսի սեր էլ չի պատահի ձեզ հետ։ Եթե անհատականություն լինեք, ազատ ու անկախ անձնավորություն, դեռ կգտնեք այդպիսի մարդու։ Իսկ եթե վախենաք, կկորցնեք նրան, ում արդեն հանդիպել ու սիրել եք։

• Եթե դուք արդեն ինչ-որ բանի հասել եք ու կարողացել վաստակել, դուք դա կրկին կանեք։ Ինչպես հնարավոր չէ լողալն ու հեծանիվ վարելը մոռանալ, այնպես էլ հնարավոր չէ մոռանալ կյանքի փոթորիկները հաղթահարելու ձևերը։

Սովի զգացում 

Պարզունակ է հնչում, բայց սովի զգացումը կարող է խոսել այն մասին, որ դուք հղի եք: Իհարկե չի կարելի մեծ ախորժակը բացատրել հղիությամբ (գուցե դա ներշնչանք է, կամ ձեր օրգանիզմը որոշակի նյութերի կարիք ունի), բայց եթե մեր ցուցակի մյուս նախանշանների հետ միասին սովի զգացում էլ ունեք, ապա ստուգեք ձեր դաշտանի օրերը: 

Պտուկների պիգմենտացիա 

Եթե պտուկի շուրջ պիգմենտավորված մաշկի գույնը սկսում է մգանալ, ապա դա կարող է խոսել հղիության մասին: Թեև այս նախանշանները հանդիպում են հորմոնալ այլ փոփոխությունների դեպքում կամ էլ կարող են մնալ նախորդ հղիությունից հետո:

Արտադրություն կամ ցավեր պտղի կցման ժամանակ

Օվուլյացիայից գրեթե ութ օր հետո ձեզ մոտ կարող է լինել արյունային արտադրություն հեշտոցից, այն կարող է լինել վարդագույն կամ շագանակագույն և ուղեկցվել աննշան դեպի ներքև ձգող ցավերով: Դա բացատրվում է արգանդի պատին պտղի կցումով: Նման արտադրություն կարող եք նկատել նաև նախադաշտանային օրերին:

Հաճախացած միզարձակում

Հենց պտուղը կպնում է արգանդին և սկսում է հատուկ հորմոր արտադրել, դուք կարող եք նկատել, որ ավելի հաճախ եք ցանկանում միզել:

Հոգնածություն

Դուք ձեզ հոգնա՞ծ եք զգում: Ավելի ճիշտ՝ սպառվա՞ծ: Պրոգեստերոնի մեծ քանակությունը կարող է ստիպել կնոջն իրեն սարսափելի հոգնած զգալ, թեև առանձնապես գործ չի արել: Նման հոգնածությունը հետապնդում է կանանց հատկապես հղիության նախնական շրջանում:

Կրծքի զգայունություն և ցավ

Երբ կինը հղի է, կուրծքը զգայուն է դառնում դիպումներին, ինչպես դաշտանի նախօրեին: Երբ օրգանիզմը հարմարվի հորմոնային նոր ֆոնին, ցավոտ զգացողությունները կմարեն:

Համային զգացողությունների փոփոխություն

Գուցե սկսեք այլ կերպ ընկալել ուտելիքի համը: Որոշ կանայք, օրինակ, սկսում են մեծ հակում ունենալ որոշակի ուտելիքների հանդեպ կամ սկսում են պարզապես զզվել որոշ ուտելիքներից:

Առավոտյան սրտխառնոց

Եթե ձեր բախտը բերի, առավոտյան սրտխառնոցը ձեզ կանհանգստացնի բեղմնավորումից մի քանի շաբաթ հետո: Իսկ եթե շատ բերի, ապա ընդհանրապես չեք զգա սրտխառնոց: Հղիության հետ կապված սրտխառնոցը կարող է առաջանալ ոչ միայն առավոտյան, այլև օրվա ցանկացած ժամի:

Դաշտանի ուշացում

Եթե դուք կայուն ցիկլ ունեք, և դաշտանը դեռ չի սկսել, ապա պետք է հղիության թեստ անել, քանի որ դաշտանի ուշացումը մեծամասամբ խոսում է հղիության մասին:

Եվ վերջապես...

Հղիության դրական թեստ

Եթե դաշտանի ուշացման առաջին օրը կամ հետագա օրերին թեստ եք արել, և այն երկու գծիկ է ցույց տվել, ապա գրեթե 100%-ոց վստահությամբ կարող ենք ասել, որ ձեր ընտանիքում ավելացում է սպասվում: Շնորհավորում ենք :)

Շաբաթ երեկոյան Թեհրանի մոտակայքում գտնվող Քարաջ քաղաքում տեղի է ունեցել Ռիխտերի սանդղակով 4 մագնիտուդով երկրաշարժ, հաղորդում է Mehr-ը։

Իրանի պաշտոնյաներին հղում անելով՝ լրատվամիջոցները հայտնում են, որ երկրաշարժի էպիկենտրոնը գտնվել է Մահդաշտում՝ Թեհրան և Ալբորզ նահանգների միջև։

Ստորգետնյա ցնցումները գրանցվել են տեղական ժամանակով ճիշտ ժամը 21:00-ին և զգացվել են նաև Սաֆադաշթում՝ Թեհրանի արևմուտքում։

Իրանի ազգային սեյսմոլոգիական կենտրոնը հայտնել է, որ երկրաշարժի ուժգնությունը կազմել է 4.0 մագնիտուդ՝ ըստ Ռիխտերի սանդղակի, հավելելով, որ այն տեղի է ունեցել մակերևույթից 8 կիլոմետր (5 մղոն) խորության վրա։

Որոշ սոցիալական ցանցերում շրջանառվող այն պնդումը, թե «Թուրքիան բացել է իր օդային տարածքը Նեթանյահուի ինքնաթիռի համար», իրականությանը չի համապատասխանում։ Այս մասին ասվում է Թուրքիայի նախագահի աշխատակազմի հաղորդակցության վարչությանը կից դեզինֆորմացիայի դեմ պայքարի կենտրոնի՝ X սոցիալական ցանցում տարածված հայտարարության մեջ։

«Մայիսի 7-ին Իսրայելի վարչապետ Բենիամին Նեթանյահուի` Ադրբեջան կատարելիք այցի համար Թուրքիայի օդային տարածքը բացելու մասին խոսք լինել չի կարող։

Թուրքիան փակել է իր օդային տարածքը իսրայելական ինքնաթիռների համար՝ Իսրայելի կողմից Գազայի նկատմամբ իրականացվող ցեղասպանական քաղաքականության հետևանքով։

Թուրքիան շարունակում է պաշտպանել պաղեստինցի ժողովրդի արդար գործը։

Մի՛ հավատացեք անհիմն մեղադրանքներին», - ասվում է թուրքական գերատեսչության հայտարարության մեջ։

Իմ կռիվը ոչ թե Հայաստանում հեղինակություն ունենալու համար է, իմ կռիվը Հայաստանում իշխանափոխության համար է: Այս մասին Հայկական համալսարանի ունկնդիրների և դասախոսների հանդիպման ժամանակ ասել է ՀՀ 3-րդ նախագահ Սերժ Սարգսյանը:

«Եթե այդ ընթացքում նախաձեռնություն ցուցաբերեր ցանկացած քաղաքական ուժի ղեկավար կամ Հայաստանում կշիռ ունեցող մարդ, նկատի ունեմ քաղաքական կշիռ, ոչ թե ֆիզիկական, ես անպայման կհանդիպեի։ Երբեք չեմ խորշել հանդիպել այնպիսի մարդկանց հետ, ովքեր կարող էին օգտակար լինել կամ օգտակար չլինել»,- նշել է երրորդ նախագահը։

Հանդիպման և ծավալուն հարցուպատասխանի ամբողջական տեսանյութը կհրապարակվի կիրակի՝ մայիսի 4-ին: