ԱՄՆ նախագահ Դոնալդ Թրամփն ասել է, որ իր կարծիքով՝ Ուկրաինայի նախագահ Վոլոդիմիր Զելենսկին պատրաստ է Ղրիմը տեսնել Ռուսաստանի կազմում՝ որպես խաղաղության համաձայնագրի մի մաս՝ չնայած Կիևը նախկինում մերժել է նման առաջարկը։ Այս մասին հաղորդում է BBC-ն։

Երբ Թրամփն հարցրել են՝ արդյոք Ուկրաինայի նախագահը պատրաստ է հրաժարվել թերակղզուց, որը 2014 թվականից գտնվում է Ռուսաստանի տիրապետության տակ, Թրամփը պատասխանել է. «Կարծում եմ՝ այո»։

Միևնույն ժամանակ ԱՄՆ նախագահն իր ռուս պաշտոնակից Վլադիմիր Պուտինին կոչ է արել «դադարեցնել կրակել, նստել և համաձայնագիր ստորագրել»։ Ըստ Թրամփի՝ դրան կարելի է հասնել երկու շաբաթվա ընթացքում։

ԱՄՆ նախագահն այս մեկնաբանություններն արել է Վատիկանից՝ Հռոմի Ֆրանցիսկոս պապի հուղարկավորությունից վերադառնալիս, որտեղ կարճ հանդիպում էր անցկացրել Վոլոդիմիր Զելենսկիի հետ։

Թրամփի խոսքով՝ հանդիպումը «լավ է անցել», և Ղրիմը քննարկվել է «շատ կարճ»։

Ըստ ԱՄՆ նախագահի՝ Զելենսկին «ավելի հանգիստ էր». ամենայն հավանականությամբ, նա նկատի է ունեցել փետրվարին Սպիտակ տանն իրենց միջև տեղի ունեցած թեժ վիճաբանությունը։

Օրերս Թրամփը հայտարարել է, որ ՌԴ-ի և Ուկրաինայի միջև համաձայնագրի հիմնական կետերը համաձայնեցվել են։ Ապրիլի 25-ին Reuters գործակալությունը, վկայակոչելով Կիևին ներկայացված ամերիկյան առաջարկի տեքստը, հայտնել էր, որ այն ներառում է ԱՄՆ-ի կողմից Ղրիմի դե յուրե ճանաչումը որպես ՌԴ-ի մաս, ինչպես նաև Մոսկվայի վերահսկողության տակ անցած ուկրաինական տարածքների դե ֆակտո ճանաչում. սրանց մեջ են մտնում Լուգանսկը, Զապորոժիեի, Դոնեցկի և Խերսոնի՝ ՌԴ-ի կողմից վերահսկվող հատվածները։ Բացի այդ, Ուկրաինա է վերադարձվում Խարկովի մարզը, իսկ Զապորոժիեի ատոմակայանը վերադառնում է Ուկրաինայի վերահսկողության տակ, սակայն այն կառավարում է ԱՄՆ-ն, իսկ էլեկտրականությունը բաշխվում է ինչպես Ուկրաինային, այնպես էլ ՌԴ-ին։ ԱՄՆ-ի պլանով բացառվում է նաև Ուկրաինայի անդամակցությունը ՆԱՏՕ-ին։

Reuters-ը հայտնել է, որ Եվրոպան և Ուկրաինան հակաառաջարկներ են ներկայացրել։

Եթե վիզայով սահմանված ժամկետից երկար եք մնում, ձեր նկատմամբ կարող է կիրառվել ԱՄՆ մուտք գործելու մշտական արգելք։ Այս մասին ֆեյսբուքյան էջում գրառում է կատարել Հայաստանում ԱՄՆ դեսպանատունը:

Դեսպանատնից զգուշացնում են՝ հյուպատոսական պաշտոնյաներին ամբողջությամբ հասանելի են ԱՄՆ մուտքի ու ելքի տվյալները, և նրանք կտեսնեն նախկինում թույլ տված խախտումները։

Այսօր՝ ապրիլի  27-ին, առեղծվածային դեպք է տեղի ունեցել Երևանում։ Ժամը 17։30-ի սահմաններում ՀՀ Ներքին գործերի նախարարության փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ Հրազդանի կիրճում, ըստ նախնական տեղեկությունների Մանկական երկաթուղու տարածքում օտարերկրացի անչափահաս աղջիկը ընկել է Հրազդան գետը։

Ինչպես դեպքի վայրից հայտնում է ֆոտոլրագրող Գագիկ Շամշյանը, արդեն 1 ժամից ավելի է մեծ թվով փրկարարներ, հատուկ նշանակության փրկարարական աշխատանքների իրականացման կենտրոնի հատուկ փրկարարաներ, ՀՀ ՆԳՆ ոստիկանության Պարեկային ծառայության Երևան քաղաքի գնդի 2-րդ գումարտակի մեծ թվով պարեկներ, ինչպես նաև քաղաքացիներ Հրազդան գետի մի քանի կմ-անոց հատվածում որոնողական աշխատանքներ են կատարում։

Գ․ Շամշյանի տեղեկություններով, երեխան, ով ընկել է Հրազդան գետը, Ուկրաինայի Հանրապետության քաղաքացի է և նրա հայրը նույնպես տեղում մասնակցում է որոնողական աշխատանքներին։

Այս շաբաթը վճռորոշ կլինի Ուկրաինայի ճգնաժամի լուծման համար, և Միացյալ Նահանգներն ունի լավատեսության հիմքեր։ Այս մասին NBC News-ին տված հարցազրույցում հայտարարել է ԱՄՆ պետքարտուղար Մարկո Ռուբիոն։

«Կարծում եմ՝ սա լինելու է վճռորոշ շաբաթ, սա լինելու է շատ կարևոր շաբաթ, որի ընթացքում մենք պետք է որոշում կայացնենք՝ արդյոք սա այն նախաձեռնությունն է, որին մենք ցանկանում ենք շարունակել մասնակցել, թե՞ ժամանակն է կենտրոնանալ այլ հարցերի վրա, որոնք նույնքան կամ որոշ դեպքերում ավելի կարևոր են», – ասել է նա։

«Կան լավատես լինելու պատճառներ, բայց անկասկած կան իրատես լինելու պատճառներ։ Մենք մոտ ենք լուծմանը, բայց ոչ բավականաչափ», – ավելացրել է Ռուբիոն։

Թուրքիայի արտաքին գործերի նախարար Հաքան Ֆիդանը կիրակի օրը հայտարարել է, որ պաղեստինյան ՀԱՄԱՍ խմբավորման հետ վերջին օրերի բանակցությունները ցույց են տվել, որ խմբավորումն ավելի պատրաստակամ կլինի այնպիսի համաձայնագրի դեպքում, որը դուրս է Գազայում հրադադարի շրջանակներից և ուղղված է Իսրայելի հետ ճգնաժամի երկարաժամկետ լուծմանը, հաղորդում է Reuters-ը։

Ապրիլի 19-ին Ֆիդանը և Թուրքիայի հետախուզության ղեկավար Իբրահիմ Քալընը Անկարայում բանակցություններ են վարել ՀԱՄԱՍ-ի պաշտոնյաների հետ, որպեսզի քննարկեն հրադադարի վերաբերյալ վերջին ջանքերը և Գազայում ստեղծված իրավիճակը։

Դոհայում ելույթ ունենալով՝ Ֆիդանը նշել է, որ բանակցությունները ցույց են տվել, որ ՀԱՄԱՍ-ը ավելի պատրաստակամ կլինի ստորագրել համաձայնագիր, որը կանդրադառնա նաև գրավյալ պաղեստինյան տարածքներին և այլ հարցերի։ 

Նա հավելել է, որ ճգնաժամը կարող է վերածվել երկու պետությունների գոյակցության հիման վրա իսրայելա-պաղեստինյան հակամարտությունը լուծելու հնարավորության։

ԱՄՆ նախագահ Դոնալդ Թրամփը պահանջել է չեղարկել ԱՄՆ դրոշով ռազմական և քաղաքացիական նավերի՝ Պանամայի և Սուեզի ջրանցքներով անցման տուրքերը։ Նա այս մասին գրել է TruthSocial սոցիալական ցանցում։

«Ամերիկյան նավերին՝ և՛ ռազմական, և՛ առևտրային, պետք է թույլատրվի անցնել Պանամայի և Սուեզի ջրանցքներով առանց վճարի: Այս ջրանցքները չէին լինի առանց Միացյալ Նահանգների: Ես խնդրել եմ պետքարտուղար Մարկո Ռուբիոյին անհապաղ ուսումնասիրել իրավիճակը»,- գրել է Թրամփը:

Քաղաքական մեկնաբան Հակոբ Բադալյանի գրառումը․

«Բոլորովին մտադիր չեմ դավադրապաշտական ֆոն կառուցել Իրանի նավահանգստում պայթյունի առնչությամբ, բայց այդ ողբերգության առումով կա իսկապես շատ ուշագրավ մի «կնիք»:

Օրեր առաջ մի հոդված-մեկնաբանություն էի գրել, որտեղ խոսում էի այն մասին, որ Ադրբբեջանի հետ շփումներում Իրանի նախագահի անվտանգության հարցը թերեւս պետք է լինի առանձնահատուկ հոգածության առարկա, հաշվի առնելով նախորդ տարվա ողբերգական փաստը՝ Ադրբեջանի հետ սահմանին նախագահների մակարդակով հանդիպումից եւ միջոցառումից վերադարձին եղավ Իրանի նախագահ Ռեյիսիին եւ արտգործնախարար Աբդոլահիանին տեղափոխող ուղղաթիռի ողբերգական վթարը, որի հետեւանքով նախագահն ու ԱԳ նախարարը զոհվեցին:

Իհարկե Իրանը ամիսներ անց հրապարակեց պաշտոնական հետաքննության արդյունքները եւ հայտարարեց, որ չի եղել որեւէ արտաքին միջամտություն եւ ուղղաթիռը աղետի է ենթարկվել եղանակային վատ պայմանների պատճառով, սակայն առ այսօր շատերի մոտ է առկա հարցը, թե ինչպես երեք ուղղաթիռներից աղետի ենթարկվեց հենց նախագահին տեղափոխողը, երբ մյուս երկուսը բարեհաջող վայրէջք էին կատարել նախատեսված վայրում:

Իսկ շրջանառվող կասկածները նաեւ պարունակում էին հնարավոր վարկածներ, որ ուղղաթիռը կարող էր ռադիոէլեկտրոնային ներգործության ենթարկվել աղետի վայրից ոչ շաատ հեռու գտնվող ադրբեջանական տարածքից, որտեղ կան տեղակայված իսրայելական հենակետեր:

Բոլոր դեպքերում, համենայն դեպս, Իրանի նավահանգստում ուժգին պայթյուն է տեղի ունենում այդ երկրի նախագահի Ադրբեջան կատարելիք այցից առաջ: Ընդ որում, ըստ վարկածների, պայթել է նավահանգստի պահեստում նյութը, որն օգտագործվում է հրթիռային վառելիքի համար»:

Ներկայացնում ենք տարադրամի փոխարժեքները՝ ըստ rate.am-ի:

ԱՄՆ դոլարի առքի առավելագույն արժեքն է 387.50 դրամ, վաճառքի նվազագույն արժեքը՝ 391.5 դրամ:

Եվրոյի առքի առավելագույն արժեքն է 438 դրամ, վաճառքի նվազագույն արժեքը՝ 444 դրամ: 

Ռուսական ռուբլու առքի առավելագույն արժեքն է 4.62 դրամ, վաճառքի նվազագույն արժեքը՝ 4.77 դրամ:

Ռուսաստանի նախագահ Վլադիմիր Պուտինը ցավակցություն է հայտնել Իրանի նախագահ Մասուդ Փեզեշքիանին՝ Բանդար Աբաս քաղաքի Շահիդ Ռաջայի նավահանգստում տեղի ունեցած ողբերգության կապակցությամբ։ Նախագահի ցավակցական ուղերձը տարածել է Կրեմլի մամուլի ծառայությունը։ 

«Ընդունեք խորին ցավակցությունս մարդկային զոհերի և մասշտաբային ավերածությունների կապակցությամբ, որոնք առաջացել են Շահիդ Ռաջայի նավահանգստում տեղի ունեցած պայթյունի հետևանքով»,- ասված է Պուտինի հեռագրում։

ՌԴ նախագահը նաև պատրաստակամություն հայտնել աջակցել աղետի հետևանքների վերացման գործում։

Նշենք, որ վերջին տվյալներով՝ տեղի ունեցած պայթյունի հետևանքով առնվազն 25 մարդ է մահացել, ավելի քան 1100 մարդ՝ տուժել։

Հիշեցնենք, որ Բենդեր Աբասում ապրիլի 26-ին հզոր պայթյուն է որոտացել։ ԶԼՄ–ների տեղեկություններով` պայթյունը եղել է նավամատույցում` վառելիքի ջրամբարի բռնկման հետևանքով։ Ինչպես հաղորդում է Fars–ը, պայթյունն այնքան հզոր է եղել, որ լսվել է Քեշմ կղզում, որը գտնվում է Պարսից ծոցի Բենդեր Աբաս նավահանգստային քաղաքից առնվազն 20 կմ հեռավորության վրա։ Պայթյունի հետևանքով մի քանի կիլոմետր շառավղով պատուհաններ են կոտրվել։

Հավելենք, որ Իրանի հարավային Հորմոզգան նահանգի ղեկավար Մոհամմադ Աշուրին եռօրյա սուգ է հայտարարել տարածաշրջանում։