Ներքին գործերի նախարար Արփինե Սարգսյանի գլխավորությամբ տեղի է ունեցել աշխատանքային քննարկում՝ կենսաչափական անձնագրերի և անձը հաստատող այլ փաստաթղթերի դիզայնին և կոնցեպտին վերաբերող հարցերի շուրջ։ Այս մասին հայտնում է ՆԳ նախարարությունը:

Այսօր Երկրի վրա մագնիսական փոթորիկ է սկսվել, մոլորակի գեոմագնիսական դաշտը թույլ գրգռված վիճակում կլինի մինչև երկուշաբթի: Տեղեկությունը հայտնում է «Ֆոբոս» կենտրոնի մասնագետ Միխայիլ Լեուսը։

«Ինչպես սպասվում էր, մեր մոլորակի տիեզերական եղանակի վրա անցած գիշեր սկսել է ազդել արևային քամին, որը դուրս է գալիս մեր աստղի վրա հերթական պսակային անցքից։ Կեսգիշերից հետո այն միջմոլորակային մագնիսական դաշտի բաղադրիչների կոնֆիգուրացիայի փոփոխություն է առաջացրել, որը Երկրի մագնիսական ոլորտի թույլ փոթորիկների պատճառ է դարձել։ Ընդ որում` Մոսկվայի ժամանակով գիշերվա ժամը 3-ից հետո այդ փոթորիկներն ուժեղացել են և հասել G2 դասի միջին մագնիսական փոթորկի մակարդակին»,-գրել է Լեուսը Telegram-ում։

Օդերևութաբանը նշել է, որ մոլորակն ավելի արագ և խիտ արևային քամու հոսքում կգտնվի մինչև երկուշաբթի ներառյալ: Նման իրավիճակում այսօր և առաջիկա երկու օրերին գեոմագնիսական դաշտը թույլ գրգռված վիճակում կլինի՝ հիմնականում G1 (թույլ) դասի մագնիսական փոթորիկների կարճ հատվածներով:

Իսրայելի հանրային հեռարձակման կորպորացիայի «Kan 11» հեռուստաընկերության հաղորդավարն ուղիղ եթերում վիրավորել է հայերին։ Այս մասին ահազանգում է Երուսաղեմի SavetheArQ (Փրկե՛ք հայկական թաղամասը) շարժման նախաձեռնող խումբն X-ի պաշտոնական էջում։

«Չեմ կարող հավատալ, որ մենք Երուսաղեմի մի ամբողջ թաղամաս տվեցինք այս տղաներին»,- ասել է հաղորդավարը «Եվրատեսիլ» երգի մրցույթում Հայաստանի ներկայացուցիչ Պարգի ելույթից հետո։

SavetheArQ–ի հայտարարության մեջ նշված է, որ շարժման անդամները ցնցված են հաղորդավարի խոսքերից և խիստ դատապարտում են այդ ամոթալի դիտողությունը։

«Սա անհանգստացնող, անհիմն, ռասիստական և վիրավորական հայտարարություն է, որը թիրախավորում է Երուսաղեմի պատմական, կրոնական և մշակութային կառուցվածքի անբաժանելի մասը կազմող հին համայնքին։ Նախևառաջ մենք ցանկանում ենք պարզաբանել, որ Երուսաղեմի հայկական թաղամասը ոչ մեկին չի «տրվել»։ Այն կառուցվել, պահպանվել և մշակվել է դարերի ընթացքում հայ ժողովրդի կողմից, որը պահպանել է իր անխափան ներկայությունը Սուրբ Երկրում և Երուսաղեմում ավելի քան 1600 տարի։ Այս ներկայությունը համաշխարհային ճանաչում ունի և յուրօրինակ ներդրում է քաղաքի հոգևոր, մշակութային և պատմական կյանքում»,- նշված է հայտարարության մեջ։

Շարժման անդամները հիշեցնում են, որ Հին քաղաքի չորս թաղամասերից մեկը՝ Հայկական թաղամասը, ծառայում է որպես համայնքների և կրոնների միջև համակեցության, համագործակցության խորհրդանիշ։ Հետևաբար նման հայտարարությունները ոչ միայն սխալ են, այլև վիրավորական և վտանգավոր և վնասում են Երուսաղեմում համատեղ կեցությանը։

«Մենք թույլ չենք տա հեռարձակողներին կամ որևէ այլ կողմի՝ խաթարելու պատմական ճշմարտությունը կամ արատավորելու ամբողջ համայնքի և ազգի արժանապատվությունը»,- շեշտվում է հայտարարության մեջ։

SavetheArQ շարժումը Իսրայելի հանրային հեռարձակող կորպորացիային հորդորել է հրապարակայնորեն հերքել արված հայտարարությունը և պաշտոնական ներողություն խնդրել Երուսաղեմի հայ համայնքից։

Հայաստանի բնակչության 23%-ը բախվում է պարենային անապահովության խնդրի հետ, հենց դրա համար էլ ՄԱԿ-ի Համաշխարհային պարենի ծրագիրը գործում է Հայաստանում և կոչ է անում նորարարական գործընկերություններ: Դրա մասին «Կայուն զարգացման համաժողով Հայաստանում․ կամուրջ Բրազիլիայում անցկացվելիք COP 30-ի և Հայաստանում անցկացվելիք COP 17-ի միջև» խորագրով համաժողովում կազմակերպված վահանակային քննարկումների ժամանակ հայտարարել է ՄԱԿ-ի Պարենի համաշխարհային ծրագրի (WFP) ներկայացուցիչ և տարածաշրջանային տնօրեն Նանա Սկաուն։

Ինչու է WFP-ն աշխատում Հայաստանում

«Նրանց համար, ովքեր ծանոթ չեն Պարենի համաշխարհային ծրագրին, պարզաբանեմ. մենք ներկա ենք 120 երկրում և ամեն տարի օգնություն ենք ցուցաբերում սովից և պարենային անապահովությունից տառապող մոտ 150 միլիոն մարդու,-ասում է Նանա Սկաուն։- Իսկ ինչո՞ւ ենք մենք Հայաստանում։ Չէ՞որ Երևանում զբոսնելիս կարելի է  մտածել, թե այստեղ ամեն ինչ գեղեցիկ է և բարեհաջող կերպով է ընթանում։ Մինչդեռ երկրում պարենային անապահովության մակարդակը մոտ 23% է։ Միայն անցյալ տարի WFP-ն օգնել է Հայաստանում մոտ 100 հազար մարդու։ Ահա թե ինչու ենք մենք այստեղ»։ 

Սկաուն ընդգծեց, որ պարենային անվտանգությունը ներառում է անելիքների լայն շրջանակ, որոնց թվումէ սննդային թափոնների կրճատումը։ Այսպես, անցյալ տարի Պարենի համաշխարհային ծրագիրը բանակցություններ է վարել Marriott հյուրանոցի հետ սննդի ավելցուկների կրճատման վերաբերյալ, Carrefour ցանցի հետ ուսումնասիրել է պարենային պահեստների գործունեության մեխանիզմները, իսկ ArmSwissbank-ի հետ՝ քննարկել արևային վահանակների տեղադրման նախագծերը։

Գործընկերությունն իբրև կայուն զարգացման հիմք

«Երբ ես ասում եմ, որ մենք ընդգրկել ենք 100 հազար մարդու, դա դեռ ամենը չէ։ Այն ամեն, ինչ մենք անում ենք, անում ենք գործընկերությամբ՝ Հայաստանի կառավարության, տեղական համայնքների, մասնավոր հատվածի, ՀԿ-ների, քաղաքացիական հասարակության և նույնիսկ ուսանողների ու համալսարանների հետ։ Մենք ակտիվորեն համագործակցում ենք ակադեմիական միջավայրի և քաղաքական կառույցների հետ»,- նշեց Սկաուն։

Նա պատկերավոր օրինակ բերեց. «Պատկերացրեք 13 հազար 850 ֆուտբոլի դաշտ։ Հենց այդքան հողատարածք՝ մոտ 4-5 հազար հեկտարի չափով, մենք անցյալ տարի Հայաստանում ապահովեցինք ոռոգման համակարգով։ Դա շատ է, այնպես չէ՞։ Այդ ամենն արվում է մարդկանց ավելի շատ և ավելի որակյալ արտադրանք թողարկելու հնարավորություն տալու համար։ Ինչո՞ւ։ Կլիմայի փոփոխությունների պատճառով։ Մենք պետք է նվազեցնենք ջրի կորուստը, սոսկ ջրի հասանելիությունն ապահովելը բավարար չէ»։

Ըստ Սկաուի՝ ուսուցումը վիթխարի նշանակություն ունի. «Օրինակ՝ մենք համագործակցում ենք Ջրօգտագործողների միության հետ, քանի որ մարդկանց պետք է սովորեցնել՝ ինչպես ճիշտ օգտագործել ջուրը։ Այդպես չպետք է լինի. մարդը բացում է ջուրը, որը երկար ժամանակ չի տեսել, և պարզապես նստում է ու նայում ջրին։ Մենք պետք է սովորեցնենք, որ այս ջուրը 5-10 տարի հետո կարող է այլևս չլինել»։

Այսպիսով, համայնքների հետ աշխատանքը ներառում է կաթիլային ոռոգման համակարգերի տեղադրում և կուտակիչ բաքերի օգտագործում։ «Եթե ես ձեզ ասեմ, որ 570 ընտանիք ստացել է նման սարքավորումներ, կմտածեք, որ դա մեծ թիվ չէ։ Բայց նայեք հարևաններին։ Նրանք ասում են. «Օ՜, սա ինչ-որ նոր բան է։ Գուցե մի քանի ամսից դրա շնորհիվ նա կարողանա իր համար ավելի լավ հեռախոս գնել։ Ես էլ եմ ուզում փորձել»։ Հենց այսպես է տարածվում նորարարությունը։ Մենք նախագծեր ենք ստեղծում համայնքների հետ միասին՝ նախագծում ենք, ներդրումներ ենք անում, և նրանք ստանձնում են ծախսերի մի մասը։ Դա ձևավորում է պատասխանատվություն, փոխում է վարքագիծը և մարդկանց պատրաստում ապագային»,- ասում է նա։ 

Արևային էներգիան փոփոխությունների շարժիչ ուժն է

Նանա Սկաուն հատուկ ուշադրություն հրավիրեց վերականգնվող էներգիայի ոլորտի նախագծերին. «Հայաստանն արև է։ Ես և այլ կազմակերպությունների իմ գործընկերները դպրոցներում, բիզնեսներում և տեղական համայնքներում ակտիվորեն մշակում ենք արևային վահանակներ տեղադրելու նախագծեր։ Այդ մոդելներն արդյունավետ են։ Միայն անցյալ տարի կատարված ներդրումների շնորհիվ հաջողվել է 1 միլիոն դոլարի խնայողություն անել։ Այդ միջոցները վերաներդրվել են դպրոցական սննդի մեջ, ինչի արդյունքում ամբողջահատիկ ալյուրից հացը նույն գինն ունի, ինչ սպիտակ հացը, և այդպես շարունակ։ Դա նաև հնարավորություն է տվել ընդամենը մեկ տարվա ընթացքում ածխաթթու գազի արտանետումները կրճատել 3000 մետր տոննայով»։ 

Ըստ նրա՝ նախագծում ներկայում  232 օբյեկտ է ներգրավված, և WFP-ն բանակցություններ է վարում մասնավոր հատվածի և միջազգային ֆինանսական հաստատությունների հետ՝ այդ մոդելներն ընդլայնելու համար։ «Դա շրջանաձև տնտեսություն է. դուք համակարգը հանձնում եք համայնքին, նրանք գումար են խնայում և պարտավորվում են հինգ տարվա ընթացքում այդ գումարը վերաներդնել կայուն լուծումների մեջ՝ լինի դա սննդի անվտանգություն, թափոնների կառավարում, թե՝ այլ նախաձեռնություններ»։ 

Սկաուն միաժամանակ ընդգծեց, որ այս նախագծերը բավականին բյուջետային են։ «40 կիլովատտ հզորությամբ համակարգն 30 հազար դոլարից էլ պակաս արժի: Ներդրումների վերադարձն ապահովվում է հինգ տարվա ընթացքում. տարեկան խնայողությունները կազմում են 5-6 հազար դոլար: Այդ գումարն ուղղվում է համայնքների զարգացմանը: Դա հսկայական հնարավորություն է: Նորարարություն, որն արդյունավետ է, և ցանկացած ոք կարող է միանալ դրան»,- եզրափակեց նա: 

Նշենք, որ մայիսի 15-ին Երևանում տեղի ունեցավ «Կայուն զարգացում. կամուրջ՝ Բրազիլիայում անցկացվող COP 30-ի և Հայաստանում անցկացվող COP 17-ի միջև» համաժողովը։ Համաժողովը կազմակերպվել էր ICC Armenia-ի, Զանգեզուրի պղնձամոլիբդենային կոմբինատի, Philip Morris Armenia LLC-ի և DWV-ի հետ համատեղ։

Ուկրաինայի նախագահ Վլադիմիր Զելենսկին հանդիպել է Դանիայի վարչապետ Մետե Ֆրեդերիկսենի հետ։

Բանակցությունների արդյունքների մասին նա գրել է Telegram-ի իր ալիքում։

«Լավ հանդիպում ունեցա Դանիայի վարչապետ Մետե Ֆրեդերիկսենի հետ: Մենք խոսեցինք ուկրաինական պաշտպանական արդյունաբերության մեջ ռազմական աջակցության և ուղղակի ներդրումների մասին: Դանիան մեր պետությանն աջակցելու առաջատարներից մեկն է և արդեն պատրաստում է Ուկրաինային ռազմական օգնության 26-րդ փաթեթը», - ասել է Զելենսկին:

Նրա խոսքով, կողմերը քննարկել են նաեւ Ստամբուլում կայացած ռուս-ուկրաինական բանակցությունները, ԱՄՆ-ի ու եվրոպացի գործընկերների հետ դիվանագիտական ​​ջանքերի համակարգումը։

«Այս տարվա հուլիսին Դանիան կսկսի իր նախագահությունը ԵՄ Խորհրդում: Մենք հույս ունենք աջակցության վրա եվրաինտեգրման հարցում և քննարկել ենք դա հանդիպման ժամանակ»,- հավելել է Ուկրաինայի նախագահը:

ԿԳՄՍ նախարարությունը հանրային քննարկման է ներկայացրել դպրոցական տարիքի երեխաներին հանրակրթության մեջ ընդգրկելու, սահմանված ժամկետից ուշ հանրակրթության մեջ ընդգրկվող երեխաների կրթության կազմակերպման և հանրակրթական ուսումնական հաստատությունից սովորողին այլ ուսումնական հաստատություն տեղափոխելու և ազատելու կարգում փոփոխություններ կատարելու մասին նախագիծը:

Ինչպես տեղեկացրին ՀՀ կրթության, գիտության, մշակույթի և սպորտի նախարարությունից, նախագծով առաջարկվում է հստակեցնել ուսումնական հաստատություններ սովորողների ընդունելության, ուսումնական հաստատությունից այլ ուսումնական հաստատություն տեղափոխության մասին կարգավորումները, սահմանել այդ ժամկետների կիրառման բացառությունների դեպքերը:

Նոր շրջանառվող նախագծով այս կարգավորման մասով արվել է բացառություն, մասնավորապես, այն դեպքում, երբ կրթության առանձնահատուկ պայմանների գնահատման արդյունքում երեխայի մոտ արձանագրվել է մանկավարժահոգեբանական ծառայությունների 3-րդ և 4-րդ աստիճանի աջակցության կարիք, հետևաբար, նա կարող է ընդգրկվել իր տարիքային խմբից մեկ դասարան ցածր, այն է՝ 7 տարեկանը՝ 1-ին դասարանում, 8 տարեկանը՝ 2-րդ դասարանում: Այս դեպքում երեխայի՝ հաստատություն ընդգրկվելն իրականացվում է ոչ թե էլեկտրոնային հայտագրմամբ, այլ հաստատության տնօրենին ծնողի ներկայացրած դիմումի, իսկ մեկ դասարան ցածր ընդգրկվելու նպատակով՝ նաև կարիքի գնահատման դիմումի հիման վրա:

Ըստ հիմնավորման՝ նշված փոփոխությունը պայմանավորված է այն հանգամանքով, որ կրթության առանձնահատուկ պայմանների կարիք ունեցող և սահմանված ժամկետից ուշ դպրոց ընդունվող սովորողներին նպատակահարմար չէ անմիջապես ընդունել 2-րդ կամ ավելի բարձր դասարան։ Այդ սովորողները հաճախ չունեն նախնական ուսումնական հմտություններ, սոցիալ-հուզական և վարքային կայունություն, ինչպես նաև կարող են զգալի դժվարություններ ունենալ դասարանային պահանջներին հարմարվելու, խմբում ներառվելու, առաջադրանքները հասկանալու և ինքնուրույն աշխատելու հարցում։ Հակառակ դեպքում՝ սովորողը միանգամից հայտնվում է բարձր պահանջներ ներկայացնող միջավայրում՝ առանց համապատասխան նախապատրաստության, ինչն ավելացնում է անհանգստության և կրթական գործընթացից դուրս մնալու վտանգը։ Ուստի, նպատակահարմար է այս խմբի սովորողների նկատմամբ կիրառել բացառություն և նախատեսել անհատականացված մոտեցում՝ հիմնված կրթության առանձնահատուկ պայմանների կարիքի վրա։

Մեկ այլ փոփոխությամբ սահմանվում է՝ ՀՀ տարածքում հաստատությունից հաստատություն տեղափոխումը կատարվում է ամբողջ ուսումնական տարվա ընթացքում մինչև մայիսի 1-ը՝ բացառությամբ արտերկրից տեղափոխվող սովորողների, ինչպես նաև սովորողների բնակավայրի փոփոխության դեպքերի, որոնց դեպքում թույլատրվում է տեղափոխումը կատարել մինչև ուսումնական պլանով նախատեսված՝ տվյալ ուստարվա պարապմունքների վերջին օրը ներառյալ։

Առաջարկվող մեկ այլ փոփոխությամբ՝ ՀՀ մարզերի բոլոր այն բնակավայրերում, որոնցում հաստատությունը տվյալ կրթական աստիճանում կրթություն իրականացնող միակ պետական ուսումնական հաստատությունն է կամ տվյալ բնակավայրում (Երևան քաղաքում՝ տվյալ վարչական շրջանում) գործող պետական հաստատություններում տվյալ կրթական աստիճանի համար լիցենզիայով տրված սահմանային տեղերը զբաղված են, սովորողի ընդունելությունը հաստատություն իրականացվում է՝ անկախ լիցենզիայով տրված սահմանային տեղերի սահմանափակումից:

Նախագծի քննարկումը Իրավական ակտերի նախագծերի հրապարակման միասնական հարթակում՝ https://www.e-draft.am/projects/8686, կշարունակվի մինչև մայիսի 31-ը. քաղաքացիները, շահագրգիռ կազմակերպություններն ու կառույցները կարող են ներկայացնել իրենց կարծիքները, դիտողություններն ու առաջարկները»,- ասվում է հաղորդագրության մեջ:

ԱԺ նախագահի պաշտոնակատար Հակոբ Արշակյանը կարգադրություն է ստորագրել․

Ղեկավարվելով «Ազգային ժողովի կանոնակարգ» սահմանադրական օրենքի 5-րդ հոդվածի 2-րդ մասի 12-րդ կետով` կարգադրում եմ.

Կազմակերպել 2025 թվականի մայիսի 17-21-ը փաստահավաք առաքելությամբ Հայաստանի Հանրապետություն ժամանող՝  ԵԽԽՎ Կանոնակարգի, էթիկայի եւ անձեռնմխելիության հանձնաժողովի անդամ, Ուկրաինայի պատվիրակ Սերգեյ ՎԼԱՍԵՆԿՈԻ  գլխավորած պատվիրակության ընդունելությունը:

Ազգային ժողովի պետական-իրավական հարցերի մշտական հանձնաժողովի նախագահ Վլադիմիր ՎԱՐԴԱՆՅԱՆԻՆ՝ ընդունել պատվիրակությանը:

Ազգային ժողովի աշխատակազմի ղեկավար-գլխավոր քարտուղար  Դ. ԱՌԱՔԵԼՅԱՆԻՆ՝ պատվիրակության ընդունելությունը կազմակերպել Ազգային ժողովի նախագահի 2018 թվականի հունվարի 25-ի «Ներկայացուցչական ծախսերի իրականացման եւ հուշանվերների տրամադրման կարգի մասին» Կ-22-Ա կարգադրության համաձայն՝ Հայաստանի Հանրապետության 2025 թվականի պետական բյուջեով Ազգային ժողովին այդ նպատակի համար հատկացված միջոցների հաշվին:

Եվրամիությունը պատրաստում է Ռուսաստանի դեմ մի քանի պատժամիջոցների ռեժիմների «ամենամեծ» փաթեթը, որի մասին կհայտարարվի մայիսի 20-ին ԵՄ արտաքին հարաբերությունների խորհրդի նիստում: Այս մասին մայիսի 16-ին Բրյուսելում կայացած ճեպազրույցում հայտարարել է ԵՄ բարձրաստիճան պաշտոնյաներից մեկը։

ԵՄ արտգործնախարարները կհաստատեն սահմանափակող միջոցներ Ռուսաստանի Դաշնության դեմ պատժամիջոցների չորս ռեժիմների շրջանակներում՝ Ուկրաինայում պատերազմի, մարդու իրավունքների խախտումների, հիբրիդային պատերազմի և քիմիական զենքի կիրառման համար։

Ընդհանուր առմամբ, կընդունվեն ավելի քան 130 անհատական ​​պատժամիջոցներ, այդ թվում՝ ռուսական ռազմարդյունաբերական համալիրի, «ստվերային նավատորմի», երրորդ երկրներից ՌԴ պատժամիջոցների տակ գտնվող ապրանքներ մատակարարողների, ինչպես նաև քարոզչության և ապատեղեկատվության տարածողների դեմ։

Ուկրաինայում Ռուսաստանի ագրեսիայի համար պատժամիջոցների 17-րդ փաթեթի շրջանակներում պատժամիջոցների ցանկում կավելացվի 75 նոր իրավաբանական և ֆիզիկական անձ, ինչպես նաև «ստվերային նավատորմի» 200 նավ։ Սա ԵՄ-ի պատժամիջոցների ցանկում ընդգրկված անձանց թիվը կհասցնի ավելի քան 2500-ի, իսկ նավերի թիվը՝ ավելի քան 300-ի:

Եվրահանձնաժողովի ղեկավար Ուրսուլա ֆոն դեր Լեյենը հայտարարել է, որ Եվրամիությունն արդեն նոր լայնածավալ պատժամիջոցներ է նախապատրաստում Ռուսաստանի դեմ։ Այս միջոցները դեռ չեն հաստատվել ԵՄ խորհրդի կողմից, և դրանց քննարկումը միայն պլանավորված է, ուստի նոր պատժամիջոցների ժամկետների և շրջանակների մասին մանրամասներ դեռ հայտնի չեն։ Ըստ ֆոն դեր Լեյենի, ով Տիրանայում ելույթ է ունեցել Եվրոպական քաղաքական համայնքի գագաթնաժողովում, նոր պատժամիջոցների փաթեթը կներառի սահմանափակող միջոցներ Հյուսիսային հոսք և Հյուսիսային հոսք 2 գազատարների դեմ, նոր անուններ ավելացնելով ռուսական «ստվերային նավատորմի» նավերի սև ցուցակին, կնվազեցնի նավթի գնի առաստաղը և լրացուցիչ պատժամիջոցներ կկիրառվի Ռուսաստանի ֆինանսական հատվածի դեմ։

«Մենք պետք է մեծացնենք ճնշումը նախագահ Պուտինի վրա, քանի դեռ նա պատրաստ չէ խաղաղության»,- հայտարարել է Եվրահանձնաժողովի ղեկավարը։