«Հրապարակ» թերթը գրում է. «Արցախցիները մտադիր են մինչեւ վերջ գնալ՝ ամիսներ ձգվող կուտակային կենսաթոշակների խնդրին լուծում տալու համար։ 2019 թվականից սկսած՝ կուտակած կենսաթոշակային գումարների ճակատագիրը, Արցախից բռնի տեղահանվելուց հետո, դարձել է անորոշ։ Արցախցիները ՀՀ իշխանություններից պահանջում են՝ ովքեր դիմում են, նրանց գումարները վերադարձնել, քանի որ այդ մարդիկ մտադիր չեն դառնալ ՀՀ քաղաքացի, ուստի նրանց կուտակած գումարները կգնան-կկորչեն։

Պատկան մարմինները` տարբեր պատճառաբանություններով, իրենց վրայից ցրում են պատասխանատվությունը՝ հայտարարելով, թե իրենք կապ չունեն կուտակային ֆոնդերի հետ։ Մինչդեռ այդ գումարները կուտակվել են ՊԵԿ-ի միջոցով՝ ՀՀ-ում գործող կենսաթոշակային ֆոնդերում: Խոսքը, ընդհանուր առմամբ, մոտ 17 մլրդ դրամի եւ մոտ 35 հազար շահառուի մասին է։

Մեր տեղեկություններով՝ Արցախի քաղաքական գործիչները հանդիպում են նախաձեռնում սահմանադրագետների, իրավունքի մասնագետների, իրավաբանների հետ՝ քննարկելու այս հարցը եւ ընտրելու լուծման ճանապարհը։ Հանդիպման օրը դեռ որոշված չէ, սակայն մեր աղբյուրը չբացառեց, որ մասնագետների հետ քննարկումից հետո լուծման մի քանի ճանապարհ կընտրվի՝ սկսած անհատապես դատարաններ դիմելուց, վերջացրած Սահմանադրական դատարան դիմելով։

Շաբաթներ առաջ էլ հարցը քննարկել են ընդդիմադիրների հետ, ճանապարհներից մեկն էլ օրենքում փոփոխությունների միջոցով արդյունքի հասնելն է, սակայն ՔՊ մեծամասնության պարագայում դա գրեթե բացառվում է, ուստի մնում է դատարաններ դիմելը»:

«Փաստ» օրաթերթը գրում է.

«Փաստ» թերթի տեղեկություններով, Հայաստան եկող «արևմտյան դրամաշնորհները» վերջին մեկ տարվա ընթացքում, իսկ հունվարից հետո՝ առավել ևս, նկատելիորեն նվազել են։ Ավելին, ինչքան էլ Նիկոլ Փաշինյանն ու նրա թիմն ինքնամոռաց շարունակում են «սեր խոստովանել» Արևմուտքին, նույն Արևմուտքը բաց տեքստով ցույց է տալիս, որ առանձնապես մեծ հետաքրքրություններ չունի Հայաստանում՝ տարբեր ծրագրերի հետ կապված, առավել ևս, որ այս իշխանությունները նախորդ ծրագրերը մեծամասամբ ձախողել են: Նրանք հստակ ցույց են տալիս, որ, մեծ հաշվով, նրանց միակ խնդիրը Նիկոլ Փաշինյանի ու անմիջականորեն իշխող ուժի միջոցով Ռուսաստանին տարածաշրջանից դուրս մղելն է։

Ավելին, տարիներ շարունակ իրենց դրամաշնորհներով սնված կառույցների գործունեության արդյունավետությունից ևս, ըստ մեր աղբյուրների, Արևմուտքում բավական դժգոհ են:Բանն այն է, որ թեպետ հակառուսական տրամադրությունները քիչ չեն, սակայն դրանք Արևմուտքում բավարար չեն համարում, քանի որ հանրության գերակշիռ մեծամասնությունը դեմ է Ռուսաստանի հետ գործընկերային հարաբերությունները փչացնելու փաշինյանական քաղաքականությանը: Ըստ այդմ, այս ուղղությամբ ևս արևմտյան դրամաշնորհային հոսքերը նկատելիորեն կրճատվել են։

Թերթի տեղեկություններով, իշխանությունները միայն այս տարվա ընթացքում երկու անգամ դիմել են դրամաշնորհ տրամադրող երկու կառույցի հայաստանյան «ներկայացուցչություններ», որպեսզի մի քանի ՀԿ-ների գումարներ հատկացվեն տարբեր ծրագրեր իրականացնելու նպատակով, սակայն այդ գումարը չի տրամադրվել։ Ճիշտ է, ուղիղ մերժում չի եղել, բայց շատ «գեղեցիկ» հասկացրել են, որ տվյալ պահին նպատակահարմար չեն գտնում նման հարցերով գումար հատկացնել։

«Հրապարակ» թերթը գրում է. «Սրբազան շարժումն ակտիվ ներքին վերադասավորումների է անցել։ Քննարկում են տարբեր կառույցներ, խորհուրդներ ձեւավորելու հարցը, որոնք կվերահսկեն գործընթացը բոլոր ուղղություններով։

Վերջերս ձեւավորված համակարգող խորհուրդը, որի պատասխանատուն Կարեն Բեքարյանն է, առաջիկայում կընտրի այլ պատասխանատուների, որոնք փոքր խմբերի գործունեությունը կկանոնակարգեն: Ասենք, մեկը կհամակարգի պայքարի «խոսնակների» գործունեությունը եւ կզեկուցի համակարգող խորհրդին, որ վերլուծություններ արվեն։ Մյուսը երիտասարդական խմբերի իրազեկման աշխատանքները կկանոնակարգի եւ այլն։

Բագրատ սրբազանը մտադիր է նաեւ քաղաքական խորհուրդ՝ խորհրդակցական մարմին ձեւավորել, որտեղ կընդգրկվեն շարժման աջակից քաղաքական ուժերի ներկայացուցիչներ եւ իրենց խորհուրդներով կաջակցեն շարժման ակտիվին»:

ArmLur.am-ը զրուցել է ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանի հետ:

-Պարո՛ն Աղազարյան, սոցհարցումներ իրականացնող «Գելլափ» ընկերությունը հերթական անգամ հարցում է իրականացրել, եւ կազմակերպության հրապարակած արդյունքներով՝ իշխանության վարկանիշը կրկին իջել է, եւ պատճառն այն է, որ քաղաքացիների մեծ մասը համաձայն չեն իշխող ուժի վարած քաղաքականության եւ սահմանազատման ներկա արդյունքների հետ, այս մասին ի՞նչ կասեք:

-Իշխանության վարկանիշը, եթե իջել է, ինչքա՞ն է դարձել: Առավել առարկայական մեկնաբանության համար ես պետք է հստակ կերպով իմանամ այդ ցուցանիշները, թե ինչ թվերի մասին է խոսքը:

Ես համաձայն չեմ, թե մեր վարկանիշն իջել է:

-Այսինքն, ձեր դիտարկմամբ, որեւէ փոփոխություն չի՞ եղել, իշխանության վարկանիշը չի՞ իջել, այլ ընդհակառակը՝ ավելի՞ է բարձրացել իշխանության վարկանիշը:

-Այո՛, կարծում եմ՝ իշխանության վարկանիշը բարձրացել է, որովհետեւ այնպիսի զգայուն հարց, ինչպիսին սահմանների ճշգրտումն ու սահմանազատումն է, եւ այն էլ այնպիսի զգայուն հատվածում, ինչպիսին Տավուշի մարզինն է, որի սահամազատման ֆոնին որոշ ուժեր փորձեցին ժողովրդի մեջ անհնազանդության ալիք բարձրացնել, եւ Հայաստանի Հանրապետության քաղաքացին չկանգնեց այն անհատների կողքին, որոնք ՀՀ քաղաքացի չէին եւ ուզում էին իշխանություն փոխել Հայաստանում, նշանակում է՝ ՀՀ քաղաքացին իր խոսքն ասաց, եւ, ընդհանուր առմամբ, ես պետք է գնահատեմ, որ այս պահի դրությամբ հասարակությունը դեմ չէ իրականացվող քաղաքականությանը: Ես այդ տվյալներն ունեմ, որոնցով կարող եմ դատողություն անել:

-Պարո՛ն Աղազարյան, նշում եք, որ իշխանության վարկանիշը բարձր է, բայց, փաստ է, որ այս օրերին մեծ թվով քաղաքացիներ հանրահավաքներ, անհնազանդության ակցիաներ են իրականացնում ու պահանջում են իշխանափոխություն ու ընդվզում են երկրում տեղի ունեցող գործընթացների նկատմամբ:

-Պարբերաբար հանրահավաքներ անցկացնողների 90 տոկոսը ռեւանշիստներ են, փողով բերվածներ: Իհարկե նրանք մեր քաղաքացիներ են եւ իրավունք ունեն հանրահավաքների միջոցով իրենց դժգոհությունն արտահայտելու, բայց նրանք շատ փոքր մաս են կազմում:

-Բայց տեսնում ենք, որ բազմաթիվ հասարակ քաղաքացիներ են մասնակցում, որոնք որեւէ կուսակցության պատկանելիություն չունեն: Ձեր խոսքերից ստացվում է՝ Դուք նրանց պիտակավորում եք, թե ուղղորդված են գալիս ակցիային, եւ ինչ-որ շահ ունեն դրանից:

-Այո՛, բոլոր հանրահավաքների մասնակցիների 70 տոկոսը փողով են գալիս:

-Կարծում եք, երկրում որեւէ խնդիր չկա՞, իրենք պարզապես ուղղորդված, որեւէ շահի նպատակով գալի՞ս են:

-Ես կարծում եմ՝ խնդիր կա, եւ այդ խնդիրները ակցիան գլխավորող ուժերը փորձում են օգտագործել իշխանության գալու համար, բայց ՀՀ քաղաքացին ասում է բոլորին՝ «հանգիստ վե՛ր ընկեք տեղներդ», այդ թվում՝ նաեւ ինձ, ասում է՝ «ես կորոշեմ ինչպես եւ երբ փոխել իշխանությունը»:

Մոլդովայում մեկնարկել է Եվրամիությանն անդամակցելու բանակցությունների երկրորդ փուլը։ Ինչպես գրում է «ՌԻԱ Նովոստի»-ն, այս մասին հայտնել է եվրաինտեգրման հարցերով փոխվարչապետ Քրիստինա Գերասիմովան։

Եվրահանձնաժողովի պատվիրակությունը Քիշնևում է, որտեղ հանդիպումներ է ունեցել մոլդովացի պաշտոնյաների հետ, ովքեր պատասխանատու են եվրաինտեգրման բանակցային գործընթացի համար։

Մոլդովան սկսեց ԵՄ-ին միանալու շուրջ բանակցությունների երկրորդ փուլը՝ երկկողմանի սքրինինգով, ինչը նախատեսում է օրենսդրության վերլուծական վերանայում և թեկնածու երկրի կողմից ԵՄ հանձնարարականների կատարման գնահատում: Եվրոպական օրենսդրության մեջ «Պետական գնումներին» առնչվող հոդվածն անհրաժեշտ է ցանկացած ժողովրդավարական պետության պատշաճ գործունեության համար, քանի որ այն վերաբերում է պետական միջոցների արդյունավետ օգտագործմանը», - ասել է Գերասիմովան։

Մոլդովայի կառավարության մամուլի ծառայությունն իր հերթին նշել է, որ երկկողմ սքրինինգի առաջին հանդիպմանը մասնակցել է Եվրոպական հարևանության հարցերով հանձնակատար Օլիվեր Վարհելին, ով խոսել է գործընթացի ընթացակարգի մասին։

2022 թվականի հունիսին ԵՄ-ն Ուկրաինային և Մոլդովային շնորհեց ԵՄ թեկնածու երկրների կարգավիճակ՝ մի քանի խիստ պայմաններ սահմանելով անդամակցության բանակցությունների պաշտոնական մեկնարկի համար։ ԵՄ-ն բազմիցս խոստովանել է, որ նման որոշումը հիմնականում խորհրդանշական էր՝ Մոսկվային դեմ Կիևի և Քիշնևի դիմակայությանն աջակցելու համար։

ԱՄՆ պետքարտուղար Էնթոնի Բլինքենը՝ Վաշինգտոնում՝ ՀՀ-ԱՄՆ-Ադրբեջան եռակողմ հանդիպման արդյունքներով հայտարարություն է արել․

«Վերջին տարիների ընթացքում Հայաստանն ու Ադրբեջանը շատ կարևոր աշխատանք են կատարել բանակցային գործընթացի և խաղաղության համաձայնագրի կնքման ուղղությամբ, որը անհավանական հնարավորություններ կբացի ինչպես երկու երկրների, այնպես էլ տարածաշրջանի և Միացյալ Նահանգների հետ հարաբերությունների համար: 

Այս ամբողջ գործընթացի ընթացքում Միացյալ Նահանգները ձգտում էր օգնություն և աջակցություն ցուցաբերել՝ Եվրամիության և Եվրոպայում բազմաթիվ գործընկերների հետ միասին: 

Այսօր հնարավորություն կա ամփոփելու ձեռք բերված առաջընթացը և անելիքները։ Բայց, հիմնվելով բոլոր հանդիպումների վրա, ներառյալ վերջին շաբաթները, ես հավատում եմ, որ երկու երկրներն էլ շատ մոտ են վերջնական համաձայնագրի կնքմանը, որին Միացյալ Նահանգները համառորեն կաջակցի: 

Ես շատ երախտապարտ եմ, որ այսօր հնարավորություն ունեցա կրկին ամփոփել, թե որ փուլում ենք մենք և հասկանալ, թե ուրիշ ինչ կարող է անել Միացյալ Նահանգները, որպեսզի օգնի ձեզ գալ համաձայնության»։ 

Քաղաքագետ Արա Պողոսյանը ֆեյսբուքյան իր էջում գրել է. «Պետք է ցավով նշեմ, որ խնդիրներ դեռ շա՜տ են լինելու, ընդ որում ոչ միայն ինտերնետ-կոմունիկացիոն, այլեւ լոգիստիկ, էներգետիկ, պարենային, քաղաքական և այլն։

Պատրաստվել ու անակնկալներից չվախենալ, որովհետև սա եղել է մեր ընտրությունը` հանդուրժել ու հաշտվել ստեղծված անտանելի և նվաստացուցիչ իրավիճակի հետ։

Համենայնդեպս, ժողովրդի մի հատված հաշտ է սրա հետ, ուրեմն պետք է անցնենք այս աղետի միջով»:

Աղբյուրը` Արա Պողոսյան

Հուլիսի 10-ին Վաշինգտոնում ՆԱՏՕ-ի կազմավորման 75-ամյակին նվիրված գագաթաժողովի շրջանակներում ԱՄՆ պետքարտուղար Էնթոնի Բլինքենի նախաձեռնությամբ և մասնակցությամբ տեղի է ունեցել ՀՀ ԱԳ նախարար Արարատ Միրզոյանի և Ադրբեջանի ԱԳ նախարար Ջեյհուն Բայրամովի հանդիպումը: Հայտնում են ՀՀ ԱԳՆ-ից։ 

Կողմերը նշել են խաղաղության և միջպետական հարաբերությունների հաստատման վերաբերյալ պատմական պայմանագրի կնքման ուղղությամբ Հայաստանի և Ադրբեջանի կողմից գրանցված առաջընթացը և համաձայնել են շարունակել աշխատանքները;

Կողմերը երախտագիտություն են հայտնել ԱՄՆ պետքարտուղարին հանդիպումը հյուրընկալելու համար։

24-ը վերջնաժամկետ․ ադրբեջանցիները մտնելու են Տավուշ․ Գառնիկ Դանիելյան.

Տեսանյութ

Ադրբեջանի ԱԳՆ-ն նույնպես հայտարարություն է տարածել ՀՀ-ԱՄՆ-Ադրբեջան եռակողմ հանդիպման արդյունքներով՝ նշելով, թե պատմական խաղաղության կնքման շուրջ առաջընթաց կա․

«Կողմերը նշել են Ադրբեջանի և Հայաստանի միջև խաղաղության հաստատման և միջպետական հարաբերությունների մասին պատմական համաձայնագրի կնքման ուղղությամբ ձեռք բերված առաջընթացը և պայմանավորվել են շարունակել աշխատանքն այդ ուղղությամբ»,-ասվում է այդ երկրի ԱԳՆ հաղորդագրության մեջ։