Իրանի գերագույն առաջնորդ այաթոլլահ Ալի Խամենեին Իրանի ԶՈւ գլխավոր շտաբի ժամանակավոր պետ է նշանակել Հաբիբոլլահ Սայարիին։ Ահմադ Վահիդին էլ նշանակվել է Իսլամական հեղափոխության պահապանների կորպուսի (ԻՀՊԿ) հրամանատար, հաղորդում է Nour News-ը։

Ավելի վաղ Իրանի պետական ​​հեռուստատեսությունը հայտնել էր, որ Իսրայելի հարվածների հետևանքով զոհվել է Իրանի զինված ուժերի գլխավոր շտաբի պետ Մոհամմադ Բաղերին։ ԻՀՊԿ-ն էլ հաստատել էր իր հրամանատար Հոսեյն Սալամիի մահը։

«Գերագույն առաջնորդի հրամանագրով Հաբիբոլլահ Սայարին նշանակվել է Իրանի զինված ուժերի գլխավոր շտաբի ժամանակավոր պետ, գեներալ Վահիդին՝ ԻՀՊԿ հրամանատար», – ասվում է հայտարարության մեջ։

Սայարին նախկինում Իրանի բանակի փոխհրամանատարն էր։

Հիշեցնենք` հունիսի 13-ի գիշերը Իսրայելը մի շարք հարվածներ է հասցրել Իրանին։ Հարձակման հետևանքով սպանվել են Իրանի բարձրաստիճան զինվորականներ և միջուկային ֆիզիկոսներ։ Իրանի քաղաքացիներին ուղղված իր ուղերձում գերագույն առաջնորդ այաթոլլա Ալի Խամենեին Իսրայելի կողմից Իրանին հասցված հարվածները հանցագործություն է որակել և հայտարարել, որ Իսրայելին «դառը և սարսափելի ճակատագրի» է սպասվում։