Նա նշեց` ԶԼՄ–ներից տեղեկացել են, որ ԱՄՆ նախագահ Դոնալդ Թրամփի թիմի նույն շրջանակն է աշխատում թե՛ Մերձավոր Արևելքի, թե՛ մի շարք կարևոր այլ թեմաների շուրջ, և այդպիսով օբյեկտիվ հանգմանքների բերումով նրանք ծանրաբեռնվում են տարբեր թեմաներով։

«Մենք ամեն ինչ անելու ենք, որ այդ ժամանակացույցը հստակ աշխատի։ Մենք նաև հստակ ըմբռնումներ ունենք»,– վստահեցրեց նա։

Անդրադառնալով երկաթուղու թեմային` ՀՀ վարչապետն ասաց, որ այն անցնելու է խորհրդային շրջանում գոյություն ունեցած երկաթուղու երթուղով, քանի որ այլ տեղ երկաթուղի կառուցելն իրատեսական չէ։

Ըստ Փաշինյանի` գազամուղն ու էլեկտրական գծերն անցնելու են էականորեն դեպի հյուսիս։ 

Փաշինյանն ասաց, որ այս պահին հստակ չէ միայն, թե նավթամուղի հետ կապված ինչ կարող է լինել, քանի որ այլ հաշվարկներ ու ներդրումներ կան։ Ըստ նրա` այդ ամենը կախված կլինի նաև նավթի միջազգային գներից։

Հիշեցնենք` ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը օգոստոսի 8-ին Վաշինգտոնում ստորագրեցին 7 կետից բաղկացած համատեղ հռչակագիր, որով նախատեսվում է Հայաստանի հարավային հատվածով (Սյունիքի մարզ) ռազմավարական տարանցիկ ճանապարհ ստեղծել, որը կկոչվի «Թրամփի ուղի» (TRIPP) և Ադրբեջանին առևտրային հասանելիություն կապահովի դեպի Նախիջևան: ԱՄՆ–ն ճանապարհը վարձակալում է 99 տարով` ևս 99 տարով երկարաձգելու հնարավորությամբ։

Հայաստանի և Ադրբեջանի արտգործնախարարներ Արարատ Միրզոյանն ու Ջեյհուն Բայրամովն էլ Հայաստանի, Ադրբեջանի և ԱՄՆ ղեկավարների ներկայությամբ նախաստորագրեցին «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը։