Մեր հասարակության մեջ ամեն ինչ հետեւյալ դիտարկյունից է դրվում՝ Ադրբեջանն էս ասեց, մյուսը էն ասեց, երրորդը էն ասեց, ու միշտ գործնականում տեսադաշտից դուրս է թողնվում ամենակարեւոր հարցը՝ իսկ մենք ի՞նչ ենք ասում։ Այս մասին, այսօր՝ սեպտեմբերի 29–ին, Ստրասբուրգում հայ լրագրողների հետ ճեպազրույցում նշեց ՀՀ վարչապետ Նիկոլ Փաշինյանը։ 

«Մենք երկար խոսել ենք Հայաստանի սուբյեկտայնացման մասին, որ Հայաստանը միջազգային հարաբերությունների սուբյեկտ է, ոչ թե օբյեկտ։ Դա նրանից է, որ մեզ երբեք չի հետաքրքրել, թե մենք ինչ ենք ասում, միշտ հետաքրքրել է, թե ուրիշներն ինչ են ասում։ Մեզ համար կարևորն այն է, թե մենք ինչ ենք ասում և մենք մեր դիրքորոշումները ինչքանով ենք համապատասխանեցնում միջազգային երթեւեկությանը և միջազգային երթեւեկության կանոններին»,– հայտարարեց Փաշինյանը։

Անդրադառնալով խոսույթին, որ Հայաստանը այլոց պահանջներն է կատարում, վարչապետն ասաց. «Հայաստանը ոչ մեկի պահանջը չի կատարում։ Մեր պատմության մեջ եղել են իրավիճակներ, երբ մենք անընդհատ վրաերթի ենք ենթարկվում ու դրա արդյունքում սկսում ենք ասել, որ անարդար աշխարհ է, թքենք քո ճակատին։ Ու չենք նայում, որ կարո՞ղ է դա նրանից է, որ մենք մայրուղու երթեւեկելի մասում ենք կանգնած։ Մենք պետք է փողոցն անցնենք ոչ թե այնտեղից, որտեղից պատահի, այլ հետիոտնային անցումով։  Դա կարող է մեկնաբանվել, որ այս կամ այն վարորդը սպառնաց մեզ և մենք այնքան թուլամորթ ու անկամ պետություն ենք, որ սկսել ենք հետիոտնային անցումով անցնել, սովորել երթեւեկության կանոնները։