Իսրայելը պնդում է, որ Իրանում հարստացված ուրանի բոլոր պաշարները պետք է լիակատար ոչնչացվեն։ Դրա մասին ՄԱԿ-ի Գլխավոր ասամբլեայում իր ելույթի ժամանակ հայտարարել է վարչապետ Բենիամին Նեթանյահուն, հաղորդում է ТАСС-ը։

Նա հիշեցրել է, որ Իսրայելն ավելի վաղ զգալի վնաս է հասցրել Իրանի միջուկային ծրագրին, սակայն ընդգծել է զգոն մնալու անհրաժեշտությունը. «Մենք չենք կարող Իրանին թույլ տալ վերականգնել իր ռազմական միջուկային ներուժը։ Նրա հարստացված ուրանի պաշարները պետք է ոչնչացվեն, և ՄԱԿ-ի Անվտանգության խորհրդի կողմից Իրանի դեմ պատժամիջոցները պետք է վաղը վերականգնվեն»,- ասել է վարչապետը։

Նեթանյահուն հայտարարել է նաև, որ Իսրայելի 12-օրյա ռազմական արշավը ավերիչ վնաս է հասցրել Իրանին և, իր կարծիքով, «կմտնի ռազմական պատմության տարեգրքերի մեջ»։ «Մենք վերացրել ենք Իսրայելի գոյության սպառնալիքը Իրանից և մահացու սպառնալիքն ամբողջ քաղաքակիրթ աշխարհի համար»,- նշել է նա՝ հավելելով, որ գործողությյան ընթացքում վերացրել են «ատոմային ռումբերի մասնագետ բարձրաստիճան զինվորականների և առաջատար գիտնականների»։