Ռուսաստանի ԱԻՆ-ին պատկանող Իլ-76 ինքնաթիռը ՌԴ քաղաքացիներին Եգիպտոսից տեղափոխել է «Ժուկովսկի» օդանավակայան։ Այս մասին մարտի 2-ին հայտնել են ՌԴ ԱԻՆ մամուլի ծառայությունից, փոխանցում է «Իզվեստիա»-ն։
Մասնավորեցվում է, որ հատուկ ավիացիոն չվերթը վայրէջք է կատարել «Ժուկովսկի» օդանավակայանում։ Ինքնաթիռը տեղափոխել է Իսրայելի տարածքում գտնվող ռուսական հաստատությունների աշխատակիցներին և նրանց ընտանիքների անդամներին, ովքեր ավելի վաղ ցամաքային անցակետերով տեղափոխվել էին Շարմ էլ-Շեյխ։
Տարհանումն իրականացվել է ՌԴ նախագահ Վլադիմիր Պուտինի հանձնարարականի և ՌԴ ԱԻՆ ղեկավար Ալեքսանդր Կուրենկովի կարգադրության շրջանակներում։ Այս պահի դրությամբ երկրի տարածք է ժամանել 84 մարդ, որոնցից 38-ը՝ անչափահասներ։
ԱՄՆ-ն և Իսրայելը փետրվարի 28-ին լայնածավալ ռազմական գործողություն են սկսել Իրանում: ԱՄՆ նախագահ Դոնալդ Թրամփը դրա նպատակն անվանել է «ամերիկացի ժողովրդի պաշտպանությունը»: Իսրայելը և ԱՄՆ-ն բազմաթիվ հարվածներ են հասցրել Իրանի ռազմական և քաղաքացիական օբյեկտներին, այդ թվում՝ Մինաբ քաղաքի դպրոցին:
Ի պատասխան՝ Իրանն սկսել է «Ճշմարիտ խոստում 4» գործողությունը և հարվածել Մերձավոր Արևելքի երկրներում գտնվող ամերիկյան ռազմակայաններին, ինչպես նաև Իսրայելի քաղաքներին: Իրանական գնդակոծությունների հետևանքով տուժել են ԱՄԷ-ն, Բահրեյնը, Իրաքը, Օմանը և Պարսից ծոցի այլ երկրներ:
Ավելի ուշ՝ մարտի 1-ին, հայտնի է դարձել, որ իսրայելական հարձակումների հետևանքով զոհվել է Իրանի գերագույն առաջնորդ այաթոլլա Ալի Խամենեին