Նավթային ընկերությունները նախազգուշացրել են ԱՄՆ-ին էներգետիկ ճգնաժամի խորացման մասին

Ամերիկյան նավթային կորպորացիաները նախազգուշացրել են ԱՄՆ նախագահ Դոնալդ Թրամփի վարչակազմին էներգետիկ շուկայում իրավիճակի հնարավոր վատթարացման մասին։ Այս մասին գրում է The Wall Street Journal-ը՝ հղում անելով սեփական աղբյուրներին։

Պաշտոնյաների և գործարարների հանդիպումը տեղի է ունեցել այս շաբաթ Սպիտակ տանը, սակայն Թրամփը դրան չի մասնակցել։ Exxon Mobil, Chevron և ConocoPhillips ընկերությունների ղեկավարները նախազգուշացրել են, որ Հորմուզի նեղուցում նավագնացության խափանումները կշարունակեն անկայունություն ստեղծել էներգակիրների շուկայում։

Exxon Mobil-ի գլխավոր տնօրեն Դարրեն Վուդսը հայտնել է, որ նավթի գները կարող են բարձրանալ ներկայիս ռեկորդային մակարդակներից էլ ավելի, եթե սպեկուլյանտներն անսպասելիորեն սկսեն բարձրացնել գները՝ մատակարարումների կրճատման ֆոնին: Բացի մատակարարումների խափանումներից, շուկան կարող է բախվել նաև նավթամթերքի սուր դեֆիցիտի:

Ինչպես նշում է WSJ-ն, ԱՄՆ-ի ներսում արդյունահանման ավելացումը կլինի սահմանափակ և չի կարող փոխարինել օրական 10 միլիոն բարել նավթին, որն այժմ արգելափակված է Հորմուզի նեղուցում: Այս ջրային տարածքով է անցնում նավթի համաշխարհային մատակարարումների 20%-ը: