Թուրքիան հերթական անգամ ընդգծում է, որ իրեն իրավունք է վերապահում պատասխանել ցանկացած թշնամական գործողության՝ անկախ դրանց ծագման աղբյուրից, ինչպես նաև ուշադիր հետևում է իրադարձությունների զարգացմանը՝ սերտորեն համագործակցելով ՆԱՏՕ-ի և մյուս դաշնակիցների հետ։ Այս մասին ամենշաբաթյա ճեպազրույցի ժամանակ հայտարարել է Թուրքիայի ազգային պաշտպանության նախարարության ներկայացուցիչ Զեքի Աքթյուրքը՝ մեկնաբանելով նախօրեին Իրանի կողմից արձակված բալիստիկ հրթիռի միջադեպը, փոխանցում են տեղական լրատվամիջոցները։
Աքթյուրքը տեղեկացրել է, որ բալիստիկ հրթիռ է վնասազերծվել Արևելյան Միջերկրականում տեղակայված ՆԱՏՕ-ի հակաօդային և հակահրթիռային պաշտպանության ուժերի կողմից։
Նրա խոսքով՝ վտանգի չեզոքացումից հետո պարզվել է, որ Հաթայ նահանգի Դյորթյոլի շրջանում ընկած բեկորը պատկանել է հենց հակաօդային պաշտպանության համակարգին, որն օգտագործվել է որսման գործողության ժամանակ։ Միջադեպի հետևանքով տուժածներ չկան։
«Թուրքիան ամենաբարձր մակարդակով պահպանում է իր վճռականությունն ու կարողությունները՝ երկրի քաղաքացիների և օդային տարածքի անվտանգությունն ապահովելու հարցում, և շարունակում է հավատարիմ մնալ պատասխանատու մոտեցմանը՝ առաջնահերթություն տալով տարածաշրջանային խաղաղության և կայունության պահպանմանը։ Այնուամենայնիվ, մենք հերթական անգամ ընդգծում ենք, որ մեզ իրավունք ենք վերապահում պատասխանել թշնամական գործողություններին, անկախ նրանից, թե ում կողմից են դրանք իրականացվում, ինչպես նաև ՆԱՏՕ-ի և մյուս դաշնակիցների հետ սերտ համակարգմամբ՝ ուշադիր հետևում ենք իրավիճակի զարգացմանը», – ասել է նա։
Գերատեսչությունում նաև նշել են, որ սոցիալական ցանցերում ամերիկա-իսրայելական հարձակումների պատճառով դեպի թուրքական սահմաններ միգրանտների ենթադրյալ հոսքի մասին տեղեկությունները չեն համապատասխանում իրականությանը։