Իրանի նորաստեղծ Պաշտպանության խորհրդի քարտուղար, դերծովակալ Ալի Շամխանին հայտարարել է, որ երկրի հրթիռային համակարգը «կարմիր գծերից մեկն է և բանակցությունների ենթակա չէ»։ Շամխանին այս մասին ասել է Al Jazeera-ի հետ հարցազրույցում։
Շամխանին Իրանի հրթիռային ուժերը բնութագրել է որպես երկրի պաշտպանական դոկտրինի անբաժանելի մաս։
«Մեր հրթիռային համակարգը գտնվում է կարմիր գծերի շրջանակներում և բանակցությունների ենթակա չէ», – ասել է նա։
Շամխանին նաև շեշտել է, որ Իրանի դեմ «ցանկացած արկածախնդրություն կստանա ուժեղ, վճռական և համաչափ պատասխան»։
Նա երկրի ռազմական պատրաստվածությունը որակել է «բարձր» և զգուշացրել, որ մյուս կողմից ցանկացած սխալ հաշվարկ կհանգեցնի «շատ ծանր» հետևանքների։
Շամխանին նաև անդրադարձել է Միացյալ Նահանգների դերին տարածաշրջանային զարգացումներում՝ պնդելով, որ Իսրայելը չի կարող գործել առանց Վաշինգտոնի անմիջական աջակցության։
Միևնույն ժամանակ, նա ընդգծել է սրացումից խուսափելու կարևորությունը։
«Տարածաշրջանային անվտանգությունն ու կայունությունը խաթարող գործողություններից զերծ մնալը բոլոր կողմերի համար ռացիոնալ ուղի է», – նշել է նա՝ հավելելով, որ տարածաշրջանում շարունակական դիվանագիտական ջանքերը նպատակ ունեն ամրապնդել քաղաքական տարբերակները և նվազեցնել լարվածությունը։
Անդրադառնալով Վաշինգտոնի հետ ընթացող բանակցություններին՝ Շամխանին ասել է, որ եթե բանակցություններն ընթանան «իրատեսորեն և առանց ծայրահեղ պահանջների», ապա դրանք կարող են դրական ընթացք ունենալ և ապահովել բոլոր կողմերի շահերը։